Dhule News : धुळे व नंदुरबार जिल्हा बँकेचे अध्यक्ष तथा माजी आमदार राजवर्धन कदमबांडे हे राजर्षी छत्रपती शाहू महाराज यांचे वारस असल्याची माहिती पंतप्रधान नरेंद्र मोदी, मुख्यंमत्री एकनाथ शिंदे, उपमुख्यमंत्री देवेंद्र फडणवीस यांना मिळाली. त्यांनी खास विमान पाठवून श्री. कदमबांडे यांना शनिवारी (ता. २७) कोल्हापूर येथे बोलावून घेतले. (Dhule News)

तेथील पंतप्रधान मोदी यांच्या सभेत श्री. कदमबांडे यांना सहभागी करून घेतले. श्री. कदमबांडे हे शाहू महाराजांचे वारस आहेत. लोकसभा निवडणुकीनिमित्त कोल्हापूर येथे शनिवारी प्रचारासाठी गेलेले मुख्यमंत्री शिंदे व उपमुख्यमंत्री फडणवीस यांना ही माहिती मिळाली. त्यांनी विशेष विमान धुळ्यास पाठवून श्री. कदमबांडे यांना कोल्हापूर येथे सन्मानपूर्वक आणावे.

अशी सूचना यंत्रणेला दिली. तांत्रिक अडचणीमुळे विशेष विमान धुळ्याऐवजी जळगाव येथील विमानतळावर उतरविण्यात आले. तेथून श्री. कदमबांडे हे सायंकाळी पावणेपाचनंतर कोल्हापूरला रवाना झाले.

ते थेट पंतप्रधान मोदी यांच्या सभास्थळी पोहोचले. साडेपाचनंतर मोदी यांची सभा संपली. पंतप्रधान मोदी यांनी श्री. कदमबांडे यांच्याशी चर्चा केली. नंतर प्रचाराच्या कामास लागावे, अशी सूचना श्री. कदमबांडे यांना केली.

मुख्यमंत्री शिंदे, उपमुख्यमंत्री फडणवीस यांनीही श्री. कदमबांडे हे शाहू महाराजांचे वारस असल्याचे कळल्यावर माहिती घेत त्यांच्याशी चर्चा केली. राजकीय वाटचालीत हा अविस्मरणीय अनुभव असल्याची प्रतिक्रिया श्री. कदमबांडे यांनी `सकाळ`शी बोलताना दिली.