Dhule News : शहराला पाणीपुरवठा करणाऱ्या हरणमाळ व नकाणे तलाव जेम्बो कालव्याद्वारे भरण्यात यावा, अशी मागणी माजी आमदार राजवर्धन कदमबांडे यांनी जिल्हाधिकाऱ्यांकडे केली. सद्यःस्थितीत साक्री तालुक्यातील मालनगाव व जामखेली मध्यम प्रकल्प भरले असून, अक्कलपाडा धरणात पाण्याचा साठा होण्यास सुरवात झाली आहे.

अक्कलपाडा धरणात कालवा सुरू करण्याएवढा पाणीसाठा झाल्यावर लगेच नकाणे व हरणमाळ तलाव भरण्यास सुरवात करण्यात यावी. हा पाणीसाठा सय्यदनगर कालवा-इरासनाला-चौगाव कालवा उडाणेनाला-उडाणे बंधारा-जम्बो कालवा (अक्कलपाडा उजवा कालवा)-उडाणे-१-उडाणे-२- गोताणे पाझर तलाव-हरणमाळ तलाव या मार्गाने भरावा.

त्यामुळे उडाणे, गोताणे परिसरातील विहिरींच्या पाणीपातळीतही वाढ होऊन पाणीटंचाई होणार नाही. जम्बो कालव्याद्वारे हरणमाळ भरल्यानंतर हरणमाळ योजनेच्या सांडव्यावरून नकाणे तलावात जलसाठा होण्यास सुरवात होईल. नकाणे तलावाच्या परिसरातील दह्याने लघुपाट बंधारे योजना अद्याप न भरल्याने नकाणे तलावात अपेक्षित पाणीसाठा होण्यास अवकाश आहे.

नकाणे तलाव त्याच्या परिसरातील पाण्यानेच नेहमी भरत असतो. त्यास भरण्यासाठी जम्बो कालव्याने सांडव्याद्वारे लवकरात लवकर भरणे शक्‍य होईल, असे श्री. कदमबांडे यांनी जिल्हाधिकाऱ्यांना दिलेल्या निवेदनात म्हटले आहे. (latest marathi news)

तसे केल्यास पाणी वाया

पाटबंधारे विभाग हरणमाळ तलावाचे पाणी नकाणे तलावात सोडून कालव्याद्वारे भरण्याची शक्‍यता नाकारता येत नाही. त्यामुळे नकाणे तलाव भरेल मात्र नकाणे तलावाच्या परिसरातून येणाऱ्या पाण्याने नकाणे तलाव भरल्यानंतर पाणी वाया जाईल व हरणमाळ तलाव कालव्याद्वारे १०० टक्के भरेलच याची शाश्वती नाही.

त्यामुळे आजघडीला हरणमाळ तलावातील ४२ टक्के पाणीसाठा तसाच ठेवून जम्बो कालव्याद्वारे तो पूर्ण भरावा व नंतर सांडव्याद्वारे नकाणे तलावात पाणी टाकावे. धुळे शहराला पाणीपुरवठा करणारे हे मुख्य जलस्रोत असल्याने ते पूर्ण क्षमतेने भरल्यास धुळे शहराच्या पाणीपुरवठ्यास मोठी मदत होईल व भविष्यातील पाणीटंचाईपासून मुक्तता मिळेल. त्यामुळे यादृष्टीने पाटबंधारे विभागाला याबाबत आदेश निर्गमित करावा, अशी मागणी श्री. कदमबांडे यांनी केली.