Dhule News : शहरात ट्रिपल सीट, धावत्या वाहनावर मोबाईल हाताळणे आणि कर्णकर्कश सायलेन्सरद्वारे ध्वनी प्रदूषण करणाऱ्या सुमारे ७० वाहनचालकांवर पोलिस उपअधीक्षक ऋषीकेश रेड्डी व शहर वाहतूक शाखेने मंगळवारी (ता. २३) कारवाई केली. त्यांच्याकडून सुमारे ७० हजारांचा दंड वसूल केला. पुढील पाच दिवस ही विशेष मोहीम शहरात सलग राबविली जाईल. (Violation of rules in Dhule)

वाहनचालकांनी नियमांचे पालन करावे, असे असे श्री. रेड्डी यांनी सांगितले. शहरात काही महिन्यांत वाहनचालकांकडून दुचाकीवर ट्रिपल सीट फिरणे, चालत्या वाहनावर मोबाईल संभाषण करणे, बुलेटला कर्णकर्कश आवाज करणारे सायलेन्सर बसविणे, अल्पवयीन चालकांच्या हाती वाहन देणे आदी प्रकारात वाढ झाली आहे.

त्यामुळे रस्ते अपघात होऊन जीवित व वित्तहानी होण्याची दाट शक्यता असल्याने पोलिस अधीक्षक श्रीकांत धिवरे, अपर पोलिस अधीक्षक किशोर काळे यांच्या मार्गदर्शनाखाली पोलिस उपअधीक्षक ऋषीकेश रेड्डी यांनी अशा प्रकारांना आळा बसावा म्हणून मंगळवारी सकाळी अकरा ते दुपारी एकदरम्यान शहरातील संतोषी माता चौक.

कमलाबाई चौक, बारापत्थर चौक, पारोळा रोड, कराची चौक, पंचवटी चौक, दत्त मंदिर चौक, गोंदूर रोड स्टेडियम आदी ठिकाणी शहर वाहतूक शाखेसह धुळे शहर, चाळीसगाव रोड, आझादनगर, देवपूर, पश्चिम देवपूर, मोहाडी पोलिस ठाण्यांकडून विशेष मोहीम राबविण्यात आली. (latest marathi news)

अशी झाली कारवाई

दुचाकीवरून ट्रिपल सीट प्रवास करणाऱ्या ६० वाहनधारकांवर कारवाई करण्यात आली. त्यांना एकूण ६० हजारांचा दंड आकारण्यात आला. तसेच चालत्या वाहनावर मोबाईल संभाषण करणाऱ्या सात वाहनधारकांवर कारवाई करण्यात आली. त्यांना प्रत्येकी हजारप्रमाणे सात हजारांचा दंड केला. कर्णकर्कश आवाज करणारे सायलेन्सर बसवून ध्वनी प्रदूषण करणाऱ्या तीन बुलेट वाहनचालकांवर कारवाई झाली.

त्यांना तीन हजारांचा दंड आकारला. ही विशेष मोहीम सलग पाच दिवस राबविली जाईल. वाहनचालकांनी वाहतूक नियमांचे पालन करावे आणि कारवाईपासून बचाव करावा, असे आवाहन उपअधीक्षक ऋषीकेश रेड्डी व शहर वाहतूक शाखेचे साहाय्यक पोलिस निरीक्षक भूषण कोते यांनी केले.