निजामपूर-जैताणे (धुळे) : माळमाथा परिसरातील खुडाणे (ता.साक्री) येथील संत सावता महाराज मंदिरात समता मेमोरियल फाउंडेशन (मुंबई), संत श्री. रणछोडदास आय हॉस्पिटल, वासदा (गुजरात) व खुडाणे ग्रामपंचायत यांच्या संयुक्त विद्यमाने सुमारे 100 गरजू रुग्णांची नुकतीच मोफत नेत्रतपासणी करण्यात आली.
 
त्यापैकी 25 रुग्णांवर वासदा (गुजरात) येथील संत श्री.रणछोडदास आय हॉस्पिटलमध्ये नेत्ररोगतज्ञांकडून मोफत मोतीबिंदू लेन्स शस्त्रक्रिया केली जाणार आहे. तसेच रुग्णांच्या येण्याजाण्याची, राहण्याची, चष्मा व औषधोपचाराची सर्व सोयही मोफत केली जाणार आहे. 'या जीवनात दृष्टीला खूपच महत्व असून असेल दृष्टी तर दिसेल सृष्टी' असे प्रतिपादन सरपंच प्रतिनिधी पराग माळी यांनी यावेळी बोलताना केले.
  
नेत्रतपासणी शिबिराच्या उदघाटनप्रसंगी डॉ. दिपक गजबे, डॉ.प्रकाश गवळे, गणेश देवरे, सरपंच प्रतिनिधी पराग माळी, उपसरपंच नाना माळी, ग्रामपंचायत सदस्य राजेंद्र खैरनार, कन्हैयालाल काळे, अशोक खलाणे, विश्राम खैरनार, संजय गवळे, मनोज माळी आदी उपस्थित होते. कार्यक्रमाच्या यशस्वीतेसाठी गावातील सर्व तरूणांनी विशेष परिश्रम घेतले.