मालेगाव - महापालिकेच्या घंटागाड्या, ट्रॅक्‍टर यांसह स्वच्छता ठेकेदार वॉटरग्रेसच्या ४० घंटागाड्या व ४० ट्रॅक्‍टरवर दोन महिन्यांत जीपीएस यंत्रणा कार्यान्वित करण्याचे आदेश देण्यात आल्याचे आयुक्त रवींद्र जगताप यांनी सांगितले. 

चाचणी स्वरूपात १४ घंटागाड्यांवर जीपीएस यंत्रणा सुरू केली आहे. मात्र, त्याचे लोकेशन फक्त ठराविक मोबाईलवरच मिळते.

महापालिका व ठेकेदाराच्या सर्व वाहनांवर जीपीएस यंत्रणा कार्यान्वित झाल्यानंतर स्वच्छतेच्या तक्रारी कमी होण्यास मदत होईल. याबरोबरच ट्रॅक्‍टर व घंटागाड्या दररोज नियमितपणे कचरा संकलन करतात की नाही,

याबाबतची माहिती मिळू शकेल. ही यंत्रणा सुरू केल्यास स्वच्छ सर्वेक्षण मोहिमेत गुणांकन वाढण्यास मदत होणार आहे. यामुळे इंधन चोरीलाही आळा बसू शकेल. महापालिकेच्या स्वच्छता वाहनांमार्फत वाहनचालक, भांडारपाल व कर्मचारी संगनमताने इंधन चोरी करतात. त्यामुळे मोठे आर्थिक नुकसान होते. स्वच्छतेचा ठेका देऊनही नियमित स्वच्छतेचा अभाव आहे. शहरातील अनेक भागांत कचऱ्याचे ढिगारे आढळून येतात. किमान मुख्य बाजारपेठा, प्रमुख रस्ते, शाळा, महाविद्यालय, मंदिर व प्रार्थनास्थळ परिसरात स्वच्छता असावी, या भागातील तक्रारींचे तातडीने निराकरण व्हावे, अशी शहरवासीयांची अपेक्षा आहे. स्वच्छतेच्या तक्रारी तातडीने मार्गी लागण्यासाठी शहरवासीयांनी स्वच्छता ॲप डाऊनलोड करावे, असे आवाहन श्री. जगताप यांनी केले.