शहादा : आरटीओ चेकपोस्टवर होत असलेला गैरप्रकार लक्षात घेऊन गुजरात शासनाने राज्यातील 16 चेकपोस्ट 20नोव्हेंबर पासून कायमस्वरूपी बंद करण्याचा निर्णय घेतला आहे. महाराष्ट्रातील चेकपोस्ट तर भ्रष्टाचाराचे आगार असल्याची ओरड सर्रास होत असल्याने राज्यातील ही चेकपोस्ट बंद करण्याचे धारिष्ट्य शासन दाखवेल का असा प्रश्न उपस्थित होत आहे. 

दरम्यान चेकपोस्ट हटविल्यानंतर, कोणतेही अतिरिक्त भार असलेले वाहन किंवा नियमांचे उल्लंघन झाल्याचे दिसून आले किंवा कर आकारणी बाकी असल्यास दंड किंवा कराची रक्कम थेट वाहन मालकांना दिली जाईल व त्यांच्या खात्यातून परस्पर वजा केले जाईल. त्यामुळे चेकपोस्टवर होणाऱ्या वाहनांच्या रांगा बंद होण्यासह लाखो लिटर इंधनाचे बचत होणार आहे. 

गुजरात राज्यात प्रादेशिक आरटीओ विभागाच्या 16 चेकपोस्ट आहेत. सदरचे चेकपोस्ट रद्द करण्याचा निर्णय राज्य शासनाने घेतला आहे. येत्या 20 नोव्हेंबरपासून राज्यातील सर्व चेकपोस्ट बंद होतील. त्यानंतर वाहन चालकांना चेकपोस्टवर उभे रहावे लागणार नाही. यातून इंधनाचीही बचत होईल. यापुढे चेकपोस्टवर कोणत्याही प्रकारचा गैरवर्तन किंवा जड वाहनांचा दंड ऑनलाइन गोळा केला जाईल. याचा अर्थ थेट मालकाच्या खात्यातून ऑनलाईनने रक्कम कपात केली जाईल. 

चेकपोस्टवरील गैरप्रकारांमुळे निर्णय 
राज्यातील वेगवेगळ्या आरटीओ चेकपोस्टवर गैरप्रकार व मोठ्या प्रमाणात कर्मचारी वाटपामुळे वाहन विभागाने चेकपोस्टचे निर्मूलन व दंड वसूल करण्याची व्यवस्था ऑनलाइन केली आहे. 
चेकपोस्टवर तैनात कर्मचारी आणि त्यांच्या नेमणुकां संदर्भात गैरवर्तनाच्या तक्रारी होत्या. चेकपोस्टवर तपासणी केल्यावरही बर्याचदा वाहनांच्या लांबच लांब रांगा लागतात. त्या दरम्यान इंधनही वाया जाते. राज्यातील सर्व 16चौक्‍या 24 तास कार्यरत असल्याने या कार्यालयांना मोठ्या संख्येने कर्मचारी तैनात करावे लागले होते. 

चेकपोस्ट कर्मचाऱ्यांचे समायोजन 
सध्या चेकपोस्टवर काम करणार्या कर्मचाऱ्यांपैकी प्रामाणिक कर्मचाऱ्यांना फ्लाईंग स्क्वाडमध्ये ठेवण्यात येईल. तर इतर कर्मचाऱ्यांना इतर कार्यालयात पोस्टिंग केली जाईल.