पिलखोड (ता. चाळीसगाव, जि. जळगाव) : बुधवारी(ता. 26) 40 टक्के साठा असलेल्या गिरणा धरणात आतापर्यंत 7 टक्क्यांनी घसघशीत वाढ झाली आहे. त्यामुळे आज सकाळी साठा 47 टक्के झाला असल्याची माहिती धरणाचे शाखा अभियंता एस. आर. पाटील यांनी 'सकाळ'ला दिली आहे.

नाशिक जिल्ह्यात चांगला पाऊस होत आहे. त्यामुळे चणकापूर आणि पुनद या धरणांत मोठ्या प्रमाणावर पाण्याची आवक सुरू आहे. या धरणांचा साठा नियंत्रित करण्यासाठी दोन्ही धरणातून गिरणात पाण्याचा विसर्ग सुरू आहे. तर हरणबारी धरण गुरुवारी(ता.27) सकाळी ओव्हरफ्लो झाले. 

काल(ता. 28) संध्याकाळपर्यंत हरणबारीचे पाणी मालेगावच्या मोसम नदीत दाखल झाले. यामुळे सध्या चणकापूर, पुनद आणि हरणबारी अशा तीन धरणांमधून पाण्याचा विसर्ग होत आहे.

गुरुवारी(ता. 27) संध्याकाळी चणकापूर धरणातून 7 हजार 387 क्यूसेक तर पुनदमधून 3 हजार 139 क्यूसेक असे एकत्रित मिळुन ठेंगोडा बंधाऱ्यातून 8 हजार 313 क्यूसेक पाण्याचा विसर्ग सुरू होता. काल सकाळी 11 हजार 290 क्यूसेकवर गेला होता. परंतु संध्याकाळी पाण्याचा विसर्ग कमी होऊन ठेंगोडा बंधाऱ्यातून 6 हजार 311 तर हरणबारीमधून 2 हजार 587 क्यूसेक विसर्ग गिरणात सुरू होता. 

यामुळे धरणात एकूण 11 हजार 620 दशलक्ष घनफुट साठा निर्माण झाला असून 8 हजार 620 दशलक्ष घनफुट असा जिवंत साठा आहे. दरम्यान धरणात सात टक्क्यांनी चांगली वाढ झाली असून 47 टक्के पाणीसाठा झाला आहे.