चिमठाणे (धुळे) : जिल्हाधिकारी संजय यादव यांनी शिंदखेडा तालुक्यात कोरोना व्हायरस रुग्णांची संख्या झपाट्याने वाढत असल्याने दोंडाईचा व शिंदखेडा येथील कोविड केअर सेंटर येथे प्रत्येकी ५० ऑक्सिजनयुक्त बेडची निर्मितीचे आदेश २० मार्चला दोंडाईचा दौऱ्यावर असताना दिले होते. दोंडाईचा व शिंदखेडा येथील कोविड केअर सेंटर येथे ऑक्सिजन बेडची तयारी पूर्ण झाली असून ऑक्सिजन सिलिंडर उपलब्ध होत नसल्याने रुग्णांचे हाल होत आहेत. 
दोंडाईचा व शिंदखेडा येथील कोविड केअर सेंटर येथे प्रत्येकी ५० ऑक्सिजनयुक्त बेड निर्मितीच्या सूचना जिल्हाधिकारी संजय यादव यांनी आरोग्य यंत्रणेला दिल्या आहेत. नागरिकांनी ‘कोविड- १९’ ची लक्षणे दिसताच जवळच्या रुग्णालयात तपासणी करून शासकीय कोविड केअर सेंटरमध्ये दाखल व्हावे, असे आवाहन शिरपूर उपविभागीय अधिकारी डॉ. विक्रमसिंह बांदल यांनी केले आहे. शिंदखेडा तालुक्यात चिमठाणे, निमगुळ, धमाणे, मालपूर, धमाणे व आता शिंदखेडा शहर कोरोना हॉटस्पॉट झाल्याने जिल्हाधिकारी यादव हे २० मार्चला दोंडाईचा येथे दौऱ्यावर असताना १०० ऑक्सिजन बेड मंजूर केले आहेत. दोंडाईचा व शिंदखेडा येथील कोविड केअर सेंटर येथे ऑक्सिजनयुक्त बेडची तयारी पूर्ण झाली असून सिलिंडर उपलब्ध होत नसल्याने रुग्णांचे हाल होत आहेत. 

शिल्‍लक सिलेंडर दिल्‍यास वाताहत थांबणार
दोंडाईचा उपजिल्हा रुग्णालयातील वैद्यकीय अधिकारी यांच्या हेकेखोरपणामुळे रुग्णांचे हाल होत असल्याचा आरोप यावेळी करण्यात आला. दोंडाईचा येथील उपजिल्हा रुग्णालय येथे १४० ऑक्सिजन सिलिंडर उपलब्ध असून सुमारे ८८ रुग्णांना ऑक्सिजनयुक्त सुविधा देण्यात येत आहेत. शिल्लक सिलिंडर हे दोंडाईचा व शिंदखेडा येथील कोविड केअर सेंटरला उपलब्ध करून दिले तर काही रुग्णांची वाताहत थांबणार आहे. शिंदखेडा येथील ग्रामीण रुग्णालयात दोन दिवसांपूर्वी उशिरा का होईना कोरोना रॅपीड चाचणीला सुरवात झाल्याने शहरासह परिसरातील गावातील रुग्णाची सोय झाली असून पॉझिटिव्ह रूग्ण मोठ्या प्रमाणात आढळून येत आहेत. 
 
दोंडाईचा व शिंदखेडा येथील कोविड केअर सेंटरसाठी १०० ऑक्सिजनयुक्त बेडचे कामपूर्ण झाले. पण ऑक्सिजन सिलिंडर उपलब्ध करण्यासाठी प्रयत्न सुरू आहेत. दोंडाईचा येथील कोविड केअर सेंटरसाठी दोंडाईचा येथील उपजिल्हा रुग्णालयाकडून काही प्रमाणात ऑक्सिजन सिलिंडर उपलब्ध करून देण्यात आले आहेत. 
- डॉ. विक्रमसिंह बांदल, उपविभागीय अधिकारी, शिरपूर. 
 
शिंदखेडा व दोंडाईचा येथील कोविड केअर सेंटर येथे ऑक्सिजनयुक्त प्रत्येकी ५० बेड मंजूर झाले आहेत. ऑक्सिजन सिलिंडरचा वरून तुटवडा असल्याने अडचणी निर्माण झाल्या आहेत. लवकरच ऑक्सिजन सिलिंडर उपलब्ध होतील. दोंडाईचा कोविड केअर सेंटर येथे सुमारे ७० व शिंदखेडा येथील कोविड केअर सेंटर येथे सुमारे २५ रुग्णांवर उपचार सुरू आहेत. 
- डॉ. हितेंद्रसिंह देशमुख, निवासी वैद्यकीय अधिकारी, दोंडाईचा व शिंदखेडा कोविड केअर सेंटर. 

संपादन- राजेश सोनवणे