वाण्याविहीर (नंदुरबार) : अक्कलकुवा व धडगाव तालुक्यात परराज्यातून विविध कामांसाठी येणाऱ्या व्यक्तींकडून आदिवासी महिला व मुलींची फसवणूक करून त्यांच्यावर अत्याचार होत आहे. त्यांच्यावर कायदेशीर कारवाईची मागणी अनुसूचित जमाती मोर्चाचे प्रदेश उपाध्यक्ष तथा भाजपचे प्रदेश सदस्य नागेश पाडवी यांनी जिल्हा पोलिस अधीक्षक यांच्याकडे निवेदनाद्वारे केली आहे. 
अक्कलकुवा, धडगाव आदिवासीबहुल तालुके असून, या दोन्ही तालुक्यांत परप्रांतातून व बाहेर जिल्ह्यातून अनेक बांधकाम ठेकेदार, मजूर व इतर व्यवसायानिमित्त येतात. महिलांना पैशाचे आमिष दाखवून पळवून नेऊन त्यांच्यावर अत्याचार करत आहेत. अशा फसवणुकीच्या घटना घडत आहेत. विशेषतः या संबंधित व्यक्तींच्या पहिली पत्नी असतानाही ते आदिवासी मुली व महिलांना पळवून नेतात. यामुळे आदिवासी समाजात रोष निर्माण होत असून, कायदा व सुव्यवस्था बिघडण्याची शक्यता नाकारता येत नाही. अशा गैरकृत्य करणाऱ्यांची ग्रामपंचायत तसेच तालुका व जिल्हास्तरावर कोणतीही नोंद नसते. अशा व्यक्तींची गाव, तालुकास्तरावर रीतसर नोंदणी होणे गरजेचे आहे. त्यांच्या हातून काही गैरकृत्य झाल्यास योग्य ती कारवाई होणे उपयुक्त ठरेल, असे पोलिस अधीक्षकांना दिलेल्या निवेदनात म्हटले आहे.