नाशिक- शेतकरी संपाचा 1 जूनला द्वितीय वर्धापन दिन आहे. या दिवशी महाराष्ट्रात शेतकऱ्यांच्या प्रश्‍नांवर प्रत्येक तहसील कार्यालयासमोर किसान सभेतर्फे जोरदार मोर्चे काढण्याचा निर्णय किसान सभेने घेतला आहे. 
अखिल भारतीय किसान सभा, महाराष्ट्र राज्य कौन्सिलची बैठक 5 मेस परळीत झाली. त्यात हा निर्णय झाला. राज्यातील भयावह दुष्काळ, कर्जमाफी, शेतमालाचे भाव, पीकविमा, जमिनीचे हक्क, शेतकरी पेन्शन, सिंचन, रेशन, या व इतर स्थानिक मागण्यांसाठी हा मोर्चा असेल. मोर्चात समविचारी शेतकरी संघटनांनाही सहभागी करून घेण्याचा प्रयत्न आहे. 

किसान सभेच्या सर्व जिल्हा, तालुका, तसेच गाव कमिट्यांनी या संदर्भात तातडीने नियोजन करून कामाला लागावे. हजारोंच्या संख्येने पत्रके, पोस्टर काढावीत, गावसभा घ्याव्यात, व्यापक तयारी करावी व 1 जूनचे आंदोलन अभूतपूर्व ताकदीने यशस्वी करावे, असे आवाहन किसान सभेच्या राज्य कौन्सिलने केले आहे.