जळगाव ः येथील जिल्हाधिकारी कार्यालय आवारातील नगरभूमापन कार्यालयात प्रमाणपत्रासाठी दलालांचा सुरू असलेल्या सुळसुळाटामुळे सर्वसामान्यांना प्रमाणपत्रासाठी तब्बल दोन हजार रुपये मोजावे लागत आहेत. याबाबत "सकाळ'मध्ये 29 मेस "नगरभूमापन कार्यालयात प्रमाणपत्रासाठी दलाली' अशा आशयाखाली बातमी प्रसिद्ध केली होती. त्याची दखल घेत जिल्हाधिकारी डॉ. अविनाश ढाकणे यांनी एक जूनला नगरभूमापन कार्यालयाची अचानक झाडाझडती घेऊन शिपायासह कर्मचारी, अधिकाऱ्यांना चांगलेच फैलावर घेतले. नगरभूमापन कार्यालयातील "रेकॉर्ड'ची तपासणी केली. "रेकॉर्ड' लवकर सापडत नसल्याने शिपायांनाही धारेवर धरले. 

नगरभूमापन कार्यालयाच्या अनागोंदी कारभाराबाबत आमदार सुरेश भोळे यांनी जिल्हाधिकाऱ्यांकडे तक्रार केली होती. अनेक नागरिकांनीही तक्रारी केल्या. यामुळे अचानक जिल्हाधिकाऱ्यांनी नगरभूमापन कार्यालयात अधिकाऱ्यांना नागरिकांच्या तक्रारींचा जाब विचारला. "रेकॉर्ड' जागेवर ठेवले नसल्याने ते लवकर उपलब्ध होत नाही, याला जबाबदार शिपायांना बोलाविले. मात्र, शिपायांनी समोर येण्याचे धाडस दाखविले नाही. शेवटी एक महिला समोर आली. तिचे पद विचारताच मी शिपाई असल्याचे सांगितले. तब्बल दहा मिनिटांपासून मी शिपाई कोठे आहे, असे विचारतो अन्‌ तू येथेच असताना सांगत नाही,' याबाबत संताप व्यक्त केला. शिपाई रोजमेरी मेश्रामकर हिची एरंडोलला बदली करण्यात आली. 

नगरभूमापन कार्यालयातील इतरांनाही कामाबाबत तक्रारी का येतात? असे विचारून कामात सुधारणा करा; अन्यथा कारवाई होईल, असे सांगितले. याच कार्यालयातील अस्वच्छतेबाबतही जिल्हाधिकारी डॉ. ढाकणे यांनी नाराजी व्यक्त केली. नगरभूमापन कार्यालयाशी संबंधित जिल्हा अधीक्षक भूमी अभिलेख कार्यालय असते. यामुळे जिल्हा अधीक्षक सुनील घोंगडे यांनाही नगरभूमापनच्या कार्यालयाबाबत तक्रारी आहेत. त्याकडे लक्ष का देत नाहीस? असा जाब विचारला. कार्यालयातील अनागोंदीबाबत आणखी कोणावर कारवाई होते? याकडे नागरिकांचे लक्ष लागून आहे.