धरणगाव :  शिवसेनेचे उपनेते व राज्यमंत्री गुलाबराव पाटील तसेच शिवसेनेचे लोकनियुक्त नगराध्यक्ष सलीम पटेल यांच्यावर भाजप कार्यकर्ते खोटे आरोप करीत असल्यामुळे लोकसभा निवडणुकीत शिवसेनेचे कार्यकर्ते भाजप उमेदवारांचा प्रचार करणार नाही, असा ठराव शिवसेनेच्या बैठकीत करण्यात आला. 
धरणगाव येथे मंगळवारी (ता.12) शिवसेना कार्यालयात बैठक घेण्यात आली. यावेळी शिवसेनेच्या कार्यकर्त्यांनी भाजपवर रोष व्यक्त केला. भाजपतर्फे शिवसेनेचे उपनेते व राज्यमंत्री गुलाबराव पाटील व लोकनियुक्त नगराध्यक्ष सलीम पटेल यांच्यावर भाजपचे कार्यकर्ते खोटे आरोप करीत आहेत, तसेच युती धर्म पाळत नाहीत, शिवाय जळगाव लोकसभा मतदार संघाचे खासदार निष्क्रिय आहेत, ते कधी मतदार संघात फिरकलेच नाहीत, अशा विविध कारणांमुळे शिवसेना कार्यकर्त्यांनी जिल्हाप्रमुख गुलाबराव वाघ, उपजिल्हा प्रमुख पी. एम. पाटील, नगराध्यक्ष वासुदेव चौधरी, शहरप्रमुख राजेंद्र महाजन, गटनेते पप्पू भावे यांच्यासमोर रोष व्यक्त केला. शिवसेना जिल्हाप्रमुख गुलाबराव वाघ यांनी कार्यकर्त्यांचा रोष पाहून लोकसभा निवडणुकीत शिवसैनिक भाजपचे काम करणार नाही, असा ठराव मांडला. या ठरावाला सूचक म्हणून शहरप्रमुख राजेंद्र महाजन आहेत. तर गटनेते पप्पू भावे यांनी अनुमोदन दिले. यावेळी शहरातील शिवसेनेचे नगरसेवक युवा सेना विद्यार्थी सेना अल्पसंख्याक सेनेच्या पदाधिकाऱ्यांनी पाठिंबा दिला.