जळगाव ः उत्तरेकडून येणाऱ्या थंड वाऱ्याचा प्रभाव वाढला आहे. परिणामी, तापमानात सरासरीच्या तुलनेत लक्षणीय घट झाली आहे. तीन-चार दिवसांपासून 10 अंशांवर स्थिर असलेले तापमान आज घसरले. किमान तापमान 8.4 अंश सेल्सिअस अशा नीचांकी तापमानाची नोंद झाली. 
उत्तरेकडून वाहणाऱ्या थंडीच्या वाऱ्यांचा प्रवेश झाला असल्याने कमाल व किमान तापमानात घट झाली आहे. गेल्या आठवडाभरापासून पारा घसरत आहे. यात चार दिवसांपासून जळगाव जिल्ह्यातील तापमान 10 अंशांवर स्थिरावले होते. यामुळे निर्माण झालेल्या हुडहुडीने जळगावकर गारठले आहेत. सकाळपासून सुरू असलेले गार वारे दिवसभर अंगाला झोंबत आहेत. यामुळे दिवसभर उबदार कपडे घालून ठेवले जात आहेत. उत्तर भारतातील थंड वाऱ्याचा प्रभाव अधिक जाणवणार असल्याचा अंदाज हवामान विभागाकडून वर्तविण्यात आला आहे. 

नीचांकी तापमान 
उन्हाळ्यात राज्यातील उच्चांकी तापमानाची नोंद होणाऱ्या जळगावात हिवाळ्यातील यंदाच्या मोसमातील नीचांकी तापमानाची नोंद झाली आहे. गेल्या आठवड्यात 12-13 अंश सेल्सिअसवर असलेले तापमान चार दिवसांपासून 10 अंशावर स्थिर होते. परंतु, यात 2 अंशांची घसरण होऊन आजचे किमान तापमान 8.4 अंश सेल्सिअस इतके नोंदविले गेले. 

उबदार कपड्यांची विक्री वाढली 
थंडीचा जोर वाढू लागल्याने उबदार कपड्यांची मागणीही वाढली आहे. शहरातील शिवतीर्थ मैदानाजवळ असलेल्या विक्रेत्यांकडे दिवसभर गर्दी पाहावयास मिळत आहे. कानटोपी, स्वेटर, जॅकेट, हातमोजे यासारख्या उबदार कपड्यांची मागणी अधिक वाढली आहे.