नाशिक: शहरातील कॅनडा कॉर्नरवरील सुराणा ज्वेलर्स व महात्मानगर येथील द दमाज या सराफी पेढ्यांवर बुधवारी (ता. 21) दुपारी प्राप्तिकर विभागाच्या पथकाने छापे टाकले. सुराणा ज्वेलर्सने "गीतांजली' या ब्रॅन्डची फ्रेंचाइसी घेतलेली होती, तर द दमाज येथून हिऱ्यांची विक्री केली जाते. नुकताच उघडकीस आलेल्या पीएनबी घोटाळ्यातील संशयित नीरव मोदी याच्या ब्रॅन्डशी संबंधित सराफी व हिऱ्यांच्या व्यावसायिकांची प्राप्तिकर विभागाकडून सध्या चौकशी सुरू आहे. त्याअंतर्गत हे छापे पडल्याची चर्चा आहे. 
मिळालेल्या माहितीनुसार, बुधवारी दुपारी चारच्या सुमारास कॅनडा कॉर्नरवरील सुराणा ज्वेलर्स या सराफी पेढीवर प्राप्तिकर विभागाने छापा टाकला. त्याचवेळी महात्मानगर येथील द दमाज या पेढीवरही छापा टाकला. त्यानंतर शहरातील आणखी काही ज्वेलर्सच्या पेढ्यांवर छापा पडल्याची चर्चा होती. रात्री उशिरापर्यंत सुराणा व द दमाज या ठिकाणी प्राप्तिकर विभागाच्या पथकाकडून चौकशी सुरू होती. ज्वेलरी दुकानांची शटर्स अर्धवट बंद करण्यात आलेले होते. शिवाय दुकानांबाहेर सुरक्षारक्षक तैनात होते. अधिक चौकशी करण्याचा प्रयत्न केला; पण कर्मचाऱ्यांकडून काहीही माहिती मिळाली नाही. मोदीच्या ब्रॅन्डशी या दोन पेढ्यांचा संबंध आहे का, याची खात्री करण्याचे काम सध्या सुरू आहे. नीरव मोदीच्या घोटाळ्याचे तार नाशिकच्या सराफी व्यावसायिकांपर्यंत पोचल्याचे मात्र बोलले जाते आहे.