कापडणे : "कोरोना'च्या वाढत्या प्रादुर्भावामुळे भाजीपाल्याच्या वाहतुकीतही अनेक अडचणी येत आहेत. यातून भाजीपाल्याची मागणीही घटली असून, सर्वच भाजीपाल्याचे दरही अवघे दहा ते वीस रुपये प्रतिकिलोवर आले आहेत. व्यापारी टोमॅटोची 20 रुपये प्रतिकिलोप्रमाणे खरेदीसही नकार देत आहेत. किरकोळ विक्रेते दोन ते पाच रुपये प्रतिकिलोने विक्री करत आहेत. यामुळे अनेक शेतकऱ्यांनी वांगी, टोमॅटो जनावरांपुढे वैरण म्हणून टाकण्यास प्रारंभ केला आहे. येथील शेतकरी तथा माजी सरपंच जीवन माळी यांनी तर "शेतात या अन्‌ टोमॅटो न्या', असे आवाहनच केले आहे. 
मार्च, एप्रिल व मेमध्ये लग्नसराईची धूम असते. मात्र, "कोरोना'मुळे लग्नसराई ठप्प झाली आहे. या काळात नेहमी टोमॅटो आणि वांगी यांना असणारी मागणी घटली आहे. दुसरीकडे उत्पादन मोठ्या प्रमाणात झाले आहे. मात्र, ग्राहक नसल्याने ती दुभत्या जनावरांपुढे वैरण म्हणून टाकली जात आहेत. अनेक शेतकऱ्यांनी कोथिंबिरीच्या शेतातही शेळ्या- मेंढ्या सोडून दिल्या आहेत. 

टोमॅटो वाटले मोफत 
येथील माजी सरपंच जीवन माळी यांनी दीड एकर क्षेत्रात टोमॅटो व वांग्यांची लागवड केली आहे. मात्र, काढणी ठप्प झाल्याने त्यांचा उत्पादन खर्चही निघालेला नाही. कोरोनामुळे खरेदीदार व्यापारी शेताकडे फिरकेनासे झाले आहेत. यामुळे माळी यांनी टोमॅटोचे मोफत वितरण सुरू केले आहे. व्यापाऱ्यांनाही थेट शेतातून टोमॅटो नेण्याचे आवाहन केले आहे.