नंदुरबार : जिल्ह्यात आज ३० ते ४० किलोमीटर वेगाचा वादळी वारा, वीज, ढगांच्या गडगडाटासह पावसाची शक्यता हवामान विभागाने (Meteorological Department) वर्तविली आहे. (nandurbar-district-today-heavy-rain-and-strom)

वादळी वारा व मुसळधार पावसाची शक्‍यता वर्तविली असून या पार्श्वभूमीवर जिल्ह्यातील नागरिकांनी सतर्क राहावे व शेतकऱ्यांनी आपला शेतमाल सुरक्षित ठिकाणी ठेवावा, असे आवाहन निवासी उपजिल्हाधिकारी तथा मुख्य कार्यकारी अधिकारी जिल्हा आपत्ती व्यवस्थापन प्राधिकरण सुधीर खांदे यांनी (Disaster Management Authority Nandurbar) केले आहे. तलाठी, मंडळ अधिकारी व तालुकास्तरीय अधिकारी यांनी मुख्यालय सोडू नये तालुका मुख्यालयाचा नियंत्रण कक्ष कार्यरत ठेवावा. नागरिकांनी खबरदारी घेऊन कुठल्याही प्रकारची आपत्ती घडणार नाही; याबाबत दक्षता घ्यावी. अशा सुचना देखील दिल्‍या आहेत.

नागरीकांनी बाहेर जाणे टाळा

विजांच्या कडकडाटासह पावसाची पूर्वकल्पना असल्यास बाहेर जाणे टाळावे. मोकळ्या जागेत असल्यास आणि जवळपास कुठल्याही सुरक्षित इमारतीचा आसरा नसेल तर सखल जागेत जाऊन गुडघ्यात डोके घालून बसावे. आकाशात विजा चमकत असल्यास घरात किंवा सुरक्षित इमारतीत आसरा घ्यावा. घराची बाल्कनी, छत किंवा घराबाहेरील ओट्यावर थांबू नये, असे आवाहन केले आहे.