नंदुरबार : अक्कलकुवा येथील शिवसेनेचे कार्यालय जाळण्याचा प्रयत्न केल्याच्या आरोपावरून नवनिर्वाचित जिल्हा परिषद सदस्य कपील चौधरी यांना पोलिसांनी जिल्हा परिषद अध्यक्ष -उपाध्यक्ष निवडीनंतर लगेच अटक केली आहे. 
जिल्हा परिषद निवडणुकीच्या निकालानंतर अक्कलकुवा येथे नऊ जानेवारीस शिवसेनेचे जिल्हा प्रमुख आमशा पाडवी यांचा संपर्क कार्यालय जाळण्याचा प्रयत्न झाला होता. याबाबत त्या दिवशी अक्कलकुवा शहरात तणाव निर्माण झाला होता. अनेक घडामोडीनंतर शेवटी नवनिर्वाचित जिल्हा परिषद सदस्य कपील चौधरीसह आठ जणांवर गुन्हा दाखल करण्यात आला, त्या दिवसापासून चौधरी पोलिसांना चकमा देत होते. येथील जिल्हा परिषदमध्ये अध्यक्ष- उपाध्यक्ष पदाच्या निवडणुकीसाठी चौधरी भाजपच्या गोटातून उपस्थित होते. निवड प्रक्रियेनंतर पोलिसांच्या नजरा चुकवत ते बाहेर पडत असतांना त्यांच्यावर नजर ठेवून असलेले एलसीबीचे तसेच अक्कलकुव्याच्या पोलिसांनी त्यांना जिल्हा परिषद आवारातच गाठले. त्याच ठिकाणी नाट्यमयरित्या अटक करण्यात आली.