नाशिक ः इगतपुरी येथील जागतिक किर्तीच्या विपश्‍यना केंद्राचा दिड तपापासून जागेसाठीचा ग्रामीण पोलिसांशी सुरु असलेला संघर्ष आता थांबणार आहे. ग्रामीण पोलिसांच्या मागण्या पूर्ण करतांना बेजार झालेल्या या केंद्राच्या मदतीसाठी जिल्हाधिकाऱ्यांनी पुढाकार घेतला आहे. जिल्हा नियोजन समितीच्या निधीतून जिल्हा यंत्रणाच आता पोलिसांना चौकी उभारुन देणार आहे. 

इगतपुरी येथील विपश्‍यना केंद्राला जिल्हा यंत्रणेकडून काही वर्षापूर्वी सुमारे 4.97 हेक्‍टर जागा दिली गेली. जागा अपुरी पडत असल्याने यंत्रणेकडून ग्रामीण पोलिसांच्या फायरिंगसाठी वापरली जाणारी जागा दिली गेली. यंत्रणेने जागा दिली. पण तेथूनच एका अर्थाने ग्रामीण पोलिस आणि विपश्‍यना केंद्रात वादही सुरु झाले. पोलिसांना त्याबदल्यात पिंपळद येथे फायरिंगसाठी जागा देण्यात आली. मात्र संबधित जागा एक सलग नसल्याने जागा एक सखल करण्यासाठी पोलिसांचा विपश्‍यना केंद्राकडे रेटा वाटला. त्यामुळे पोलिसांच्या फायरिंग रेंजच्या जागेच्या डागडुजीसाठी केंद्राला लाखोचा भुर्दंड आला. 

पोलिसांचे नव्या ठिकाणी कामकाज सुरु झाले. पण केंद्राची समस्या मात्र सुटली नाही. तब्बल 18 वर्षापासून पोलिसांकडून पोलिस चौकी बांधून मिळावी म्हणून विपश्‍यना केंद्राकडे पाठपुरावा सुरु होता. 

अखेर तोडगा निघाला 
एका पोलिस अधिक्षकांने चौकीचा आग्रह धरला,लगेच दुसऱ्यानेही धरला, दुसऱ्याने धरला म्हणून तिसऱ्यानेही मागणी केली. तब्बल 18 वर्षे 
पोलिस चौकीसाठी पोलिसांचा आग्रह कायम राहिला. पोलिसांच्या जागा सपाटीकरणापासून तर चौकी बांधून देण्यापर्यतच्या मागण्या पूर्ण करता करता मात्र मेटाकुटीला आलेल्या विपश्‍यना केंद्राने हा विषय जिल्हा यंत्रणेकडे आणला. अखेर गुरुवारी जिल्हाधिकारी राधाकृष्णन बी यांच्याकडे त्यावर तोडगा निघाला. पोलिसांच्या चौकीला जिल्हा नियोजन समितीतून बांधून देण्याचा पर्याय पुढे येतो आहे. 

कोट 
विपश्‍यना केंद्राच्या जागेचा कुठलाही इशु नाही. जागा हस्तांतरावेळी ठरल्यानुसारच पोलिस चौकी उभारण्याच्या मागणीसाठी पोलिसांचा आग्रह आहे. पोलिस चौकीसाठी जिल्हा नियोजन मंडळातून मार्ग काढला जाईल. 
-राधाकृष्णन बी (जिल्हाधिकारी नाशिक)