नाशिक : मराठवाड्यातील टंचाई सदृश्‍य परिस्थितीचा विचार करून जलसंपदा विभागाने गंगापूर, दारण, उर्ध्वगोदावरी, मुळा व प्रवरा समुहातील सुमारे बारा टिएमसी पाणी जायकवाडी सोडण्याचा निर्णय घेतला असून त्यास आमदार प्रा. देवयानी फरांदे यांनी तीव्र विरोध केला आहे.

जायकवाडी धरणातील मृत साठा वापरण्याचे सुचविताना नाशिक मधून सहा टिएमसी पाणी सोडल्यास बाष्पीभवनामुळे ना नाशिककरांची तहान भागणार ना मराठवाड्यातील असा दावा करतं मराठवाड्याला पाणी सोडण्यास विरोध करण्यासाठी सर्व पक्षीयांनी एकत्र येण्याचे आवाहन त्यांनी आज केले. 

गोदावीर पाटबंधारे विकास महामंडळाची सोमवारी झालेल्या बैठकीत नाशिक मधील गंगापूर धरण समुह व नगर जिल्ह्यातील मुळा व प्रवरा समुहातून प्रत्येकी सहा असे बारा टीएमसी पाणी मराठवाड्यातील जायकवाडी धरणात सोडण्याचा निर्णय घेतला. त्याला आमदार फरांदे यांनी जोरदार विरोध केला आहे.

जायकवाडी धरणात सद्यस्थितीत सुमारे 69 टिएमसी पाणी जायकवाडी धरणात शिल्लक आहे. महाराष्ट्र जलसंपत्ती नियमन प्राधिकरणाच्या नियमानुसार धरणातील मृत पाणी साठा वापरता येत नसताना देखील सन 2012 पासून मराठवाड्यासाठी तो वापरला जात असल्याने सातत्याने नाशिक मधून जायकवाडीसाठी पाणी सोडावे लागतं आहे.

सन 2016 मध्ये मराठवाड्याच्या पाणी टंचाईवर मात करण्यासाठी दहा टिएमसी पाणी सोडण्यात आले. त्यावेळी सात टक्के बाष्पीभवन दाखविले गेल्याने सात टिएमसी पाणी वाया गेले. आता पुन्हा पाणी सोडल्यास बाष्पीभवन होवून नाशिक मधून पाणी तर जाईलचं शिवाय मराठवाड्याला देखील पाणी मिळणार नसल्याचा दावा करतं आमदार फरांदे यांनी पाणी सोडण्यास विरोध केला आहे. 
 
मेंढीगिरी समितीचा अहवाल चुकीचा 
गोदावरी पाटबंधारे विकास महामंडळावर औरंगाबादचेचं वर्चस्व असल्याने नाशिककरांना पाण्याच्या बाबतीत न्याय कसा मिळेल? असा सवाल आमदार फरांदे यांनी करताना मेंढीगिरी समितीच्या अहवाल चुकीचा असल्याचा दावा केला आहे. सध्या धरणात मृत व जिवंत असा 69 टक्के पाणी साठा शिल्लक असून पिण्यासाठी व उद्योगांसाठी मोठ्या प्रमाणात पाणी उपलब्ध असल्याचे मत व्यक्त करतं नाशिक मधून पाणी सोडण्यास विरोध करताना सर्व पक्षियांनी पाणी वाचविण्यासाठी एकत्र येण्याचे आवाहन त्यांनी केले.