कापडणे - पुरोगामी म्हणविल्या जाणाऱ्या कापडणे (ता. धुळे) येथे आज मातेच्या पार्थिवाला चार मुलींनी थेट स्मशानभूमीपर्यंत खांदा दिला, तर पाचव्या कन्येने मुखाग्नी देत रुढी-परंपरांना फाटा दिला. यात ग्रामस्थ, भाऊबंदकीचे पाठबळही महत्त्वाचे ठरले.

निवृत्त मुख्याध्यापिका विमलबाई दगाजीराव पाटील यांचे मंगळवारी (ता. ८) निधन झाले. त्यांच्यावर आज धुळे येथील स्मशानभूमीत अंत्यसंस्कार झाले. त्यांच्या पाचही सुशिक्षित मुलींनी रुढी व परंपरांना झुगारत आईचा अंत्यविधी केला.

मोठ्या चौघा बहिणींनी आईच्या पार्थिवाला खांदा देत थेट स्मशानभूमी गाठली, तर लहान कन्या तथा धुळे जिल्हा परिषदेच्या प्रशासन अधिकारी ज्योती पाटील यांनी मुखाग्नी दिला. विमलबाई पाटील यांचे पती दगाजीराव पाटील हे मुख्याध्यापक होते. या दांपत्याचा मुलगा भूषण शालेय वयातच अल्प आजाराने कुटुंबाला सोडून गेला. शिक्षक दांपत्याने पाचही मुलींना तळहाताच्या फोडाप्रमाणे जपले होते.