निजामपूर-जैताणे (धुळे) : येथील मुस्लिम समाज बांधवांनी पावसासाठी जैताणे (ता.साक्री) येथील खुडाणे चौफुलीवरील ईदगाह मैदानावर नुकतेच नमाजपठणासह काही हिंदू बांधवांसह दुवाही मागितली. गेल्या अडीच महिन्यांपासून माळमाथा परिसरात पाऊस न झाल्याने दुष्काळी परिस्थिती निर्माण झाली आहे. त्या पार्श्वभूमीवर पावसाला हे साकडे घालण्यात आले.

माळमाथा परिसरातील शेतकरी संकटात सापडला असून शेतातील पिके करपू लागली आहेत. गुरा-ढोरांच्याही चारा-पाण्याचा प्रश्न निर्माण झाला आहे. विहिरी व कुपनलिकांची पाणीपातळी खोलवर गेली असून पिण्याच्या पाण्याचीही मोठी समस्या निर्माण झाली आहे. त्यामुळे शेतकरी हवालदिल झाला आहे. म्हणून यावेळी विशेष नमाजपठण करून दुवाही मागण्यात आली.

मौलाना मोहम्मद रजा यांनी नमाजपठण केले. मौलाना रिजवान यांनी दुवा मागितली. यावेळी मौलाना मुबिन, मौलाना उमेर, मौलाना सादिक, ताहीरबेग मिर्झा, अलताफ कुरेशी, अबरार शेख, इंजि. मोहन सूर्यवंशी, अशोक मुजगे, मुश्ताक शाह आदींसह हिंदू-मुस्लिम समाजबांधव मोठ्या संख्येने उपस्थित होते.