शहादा : गुप्त माहितीच्या आधारे म्हसावद पोलिसांनी चिखली फाटा येथे लावलेल्या नाकाबंदीत पांढऱ्या रंगाच्या बोरेलो गाडीसह त्यात भरलेली देशी दारू असा पाच लाख ३८ हजार ७३६ रुपयांचा ऐवज जप्त करण्यात आला. सोमवारी पहाटेच्या सुमारास केलेल्या कारवाईत चालकाविरुद्ध म्हसावद पोलिस ठाण्यात गुन्हा दाखल झाला. (Nandurbar Crime Vehicle seized with liquor in blockade at Chikhli Phata In Mhaswad)

म्हसावद पोलिस ठाणे हद्दीत नाशिक परिक्षेत्राचे पोलिस महानिरीक्षक बी. जी. शेखर पाटील यांच्या आदेशाने व जिल्हा पोलिस अधीक्षक श्रवण दत्त एस. यांच्या मार्गदर्शनाने रविवारी (ता. २८) च्या रात्री अकरा ते सोमवारी (ता. २९) पहाटे पाचदरम्यान जिल्ह्यात सर्वत्र ऑलआउट स्कीम राबविण्यात आली.

त्या अनुषंगाने चिखली फाटा येथे नाकाबंदी लावण्यात आली होती. नाकाबंदीच्या ठिकाणी पांढऱ्या रंगाच्या महिंद्र बोलेरो (एमएच ०४, जीएम ५३९७)मध्ये चालक वंशा जंगल्या नाईक (वय ३६, रा. घाटली, ता. धडगाव) आपल्या ताब्यातील वाहनात अवैध दारूची चोरटी वाहतूक करीत आहे अशी गुप्त माहिती जिल्हा पोलिस अधीक्षक श्रवण दत्त एस. यांना मिळाल्याने त्यांनी म्हसावद पोलिस ठाण्याचे प्रभारी राजन मोरे यांना कळवून तत्काळ कारवाईचे आदेश दिले. (Latest Marathi News)

नाकाबंदीच्या ठिकाणी दोन टीममध्ये सापळा रचण्यात आला. रात्री पाऊणच्या सुमारास वाहनचालक बोलेरो गाडीत एक लाख ३८ हजार ७३६ रुपये किमतीच्या देशी दारूचे ५६ बॉक्स व पाच लाख ३८ हजार ७३६ रुपये किमतीच्या बोलेरो वाहनसह मिळून आला.

या वेळी चालकाविरुद्ध गुन्हा दाखल करण्यात आला. हवालदार भीमसिंग ठाकरे तपास करीत आहेत. सहाय्यक पोलिस निरीक्षक राजन मोरे, पोलिस नाईक बहादूर बिलाला, शैलेशसिंग राजपूत, पोलिस शिपाई दादाभाई साबळे, उमेश पावरा, अजित गावित, राकेश पावरा, सचिन तावडे यांच्या पथकाने कारवाई केली.