नाशिक : जिल्ह्यात सर्वत्र सुरू असलेल्या अवकाळी पावसामुळे भाजीपाला व शेतमालाची बाजारातील आवक मंदावल्याने भाजीपाल्याचे दर वधारले आहेत. या पार्श्‍वभूमीवर शनिवारी (ता. २) नाशिक बाजार समितीत कोथिंबिरीला तब्बल तीस हजार रुपये शेकडा म्हणजेच प्रतिजुडी ३०० रुपये असा दर मिळाला. 

कोथिंबीर जुडीला ३००रुपये भाव 

अवकाळी पावसामुळे शनिवारी शेतकऱ्यांना रोजच्या तुलनेत २० टक्केही भाजीपाला बाजारात आणता आला नाही. अशाही परिस्थितीत ज्यांनी महत्प्रयासाने कोथिंबीर विक्रीसाठी आणली, त्यांना मात्र चांगला बाजारभाव मिळाला. सिन्नर येथील प्रकाश बदादे यांनी २०० जुड्या नाशिकमध्ये विक्रीसाठी आणल्या होत्या. येथील साईनाथ व्हेजिटेबल कंपनीने लिलाव केला असता, त्यांना तीस हजार रुपये शेकडा असा भाव मिळाला. कोथिंबिरीला प्रतिजुडी तीनशे रुपये भाव मिळाल्याने बदादे यांनी समाधान व्यक्‍त केले. यापूर्वी याच कंपनीने ३४ हजार रुपये शेकडा दराने कोथिंबीर विकत घेऊन पुढे पाठवली होती, असे कंपनीचे संचालक राजेंद्र भोरे यांनी सांगितले.