Country Cricket : भांडण बीसीसीआय अन् पीसीबीचं; तिकडं इंग्लंड क्रिकेट बोर्डाचे ह्रदयाचे ठोके का वाढले?

Country Cricket IPL vs PSL Clash : इंडियन प्रीमियर लीग आणि पाकिस्तान सुपर लीगचे 2025 चे हंगाम हे क्लॅश होण्याची दाट शक्यता निर्माण झाली आहे. आयसीसी चॅम्पियन्स ट्रॉफी 2025 च्या आयोजनामुळं पीसीबीला पाकिस्तान सुपर लीग चा हंगाम आयपीएलच्या स्लॉटवेळीच घ्यावा लागणार आहे. पीसीबीने फ्रेंचायजींचा दबाव झुगारून याच आयपीएलवेळीच पीएसएल आयोजित करण्याचा निर्णय घेतला आहे. मात्र भारतीय क्रिकेट बोर्ड आणि पाकिस्तान क्रिकेट बोर्ड यांच्यातील या भांडणामुळं तिकडं इंग्लंड क्रिकेट बोर्डाचे धाबे दणाणले आहेत.

पाकिस्तान सुपर लीग 2025 ची सुरूवात ही 7 एप्रिल पासून होईल. ही स्पर्दा 20 मे पर्यंत चालणार आहे. त्यांनी आयपीएल स्लॉटमध्येच आपली स्पर्धा भरवण्याचा निर्णय घेतला आहे. सहसा पीएसएलचा हंगाम हा फेब्रुवारी महिन्यात होतो. मात्र आयसीसी चॅम्पियन्स ट्रॉफीमुळं त्यांना आपल्या शेड्युलमध्ये बदल करावा लागला आहे.

इंग्लंडच्या खेळाडूंना आयपीएल आणि पीएसएल या दोन्ही लीगमध्ये चांगली डिमांड असते. गेल्या तीन वर्षापासून इंग्लंडच्या खेळाडूंचा ओढा आयपीएल आणि पीएसएलकडे वाढला आहे. आता पीएसएल आणि आयपीएलच्या क्लॅशमध्ये काऊंटी क्रिकेटचं मोठं नुकसार होणार आहे. या दोन क्रिकेट लीगचा थेट क्लॅश हा काऊंटी क्रिकेटच्या सुरूवातीच्या दोन महिन्यांवर होणार आहे.

दिल्ली कॅपिटल्स आणि इस्लामाबाद युनायटेडशी संबंधीत असलेले बेन जोन्स हे टेलिग्राफला दिलेल्या मुलाखतीत म्हणतात, 'जगभरात इंग्लंडच्या खेळाडूंची मोठी डिमांड असते. आयपीएल आणि पीएसएलमध्ये किमान 30 इंग्लिश खेळाडू खेळतात. त्यांनी 2025 साठी या दोन लीगचे करार साईन केले आहेत.

गेल्या 3 वर्षात एकूण 45 इंग्लिश क्रिकेटपटूंनी आयपीएल आणि पीएसएलमध्ये सहभाग नोंदवला आहे. आता इंग्लंड क्रिकेट बोर्ड काय निर्णय घेणार हे पाहावे लागेल. जे खेळाडू विदेशातील टी 20 लीग खेळतात त्यांना इसीबीकडून ना हरकत प्रमाणपत्र घेणे बंधनकारक आहे.

(IPL Marathi News)