नाशिक - सोनसाखळीचोरांनी पुन्हा उच्छाद मांडला असून, उपनगर परिसरात आज दुपारी सोनसाखळीचोरीच्या तीन घटना घडल्या. नवरात्रोत्सवाच्या पाचव्या माळेपर्यंत मंगळसूत्र लांबविण्याच्या सात घटना घडल्या आहेत. "आदिशक्तीं'च्या या उत्सवादरम्यानच अशा घटना घडत असल्यामुळे महिलांच्या सुरक्षेवर प्रश्‍नचिन्ह निर्माण झाले आहे. उत्सवकाळात चोख पोलिस बंदोबस्त ठेवल्याचा दावा केला असताना अशा घटना घडतातच कशा, असा प्रश्‍न नागरिक उपस्थित करीत आहेत. 

पाचव्या माळेला दुपारी दीड तासात तीन महिलांचे सौभाग्याचे लेणे ओरबाडले. दुपारी दीडच्या सुमारास शुभांगी जोशी पिंटो कॉलनीतून रस्त्याने पायी जात होत्या. त्या वेळी दुचाकीवरून आलेल्या चोरट्यांनी त्यांच्या गळ्यातील आठ ग्रॅमची सोनसाखळी खेचली. या प्रकरणी अजय जोशी यांनी उपनगर पोलिसांत फिर्याद दिली. या घटनेनंतर अवघ्या दीड तासात आणखी दोन घटना घडल्या. 

दुसरी घटना शाहूनगर परिसरात घडली. सुनीता महाजन भजनासाठी जात होत्या. त्याच वेळी दुचाकीवरून आलेल्या चोरट्याने त्यांच्या गळ्यातील दोन तोळ्यांची सोन्याची पोत लांबविली. तिसरी घटना लोकमान्यनगर परिसरात घडली. जयश्री अहिरे देवीच्या भजनासाठी जात असताना दुचाकीवरून आलेल्या चोरट्यांनी त्यांच्या गळ्यातील तीन तोळ्यांची सोन्याची पोत ओरबाडली. याच परिसरात गस्तीवर असलेल्या दोन पोलिसांनी संशयित चोरट्यांचा पाठलागही करण्याचा प्रयत्न केला, परंतु ते औरंगाबाद रोडच्या दिशेने वेगात निघून गेले. उपनगर पोलिस घटनास्थळी पोचले. परिसरातील सीसीटीव्हीमध्ये संशयिताचे फुटेज तपासून संशयितांचा माग काढण्याचा प्रयत्न उशिरापर्यंत सुरू होता. 

पाच दिवसांत सात घटना 
घटस्थापनेपासून पाच दिवसांमध्ये महिलांचे मंगळसूत्र ओरबाडून नेल्याच्या सात घटना घडल्या. अंबड व गंगापूर पोलिस ठाण्यांमध्ये दोन गुन्हे दाखल आहेत. आज उपनगर पोलिस हद्दीमध्ये एकाच दिवशी तीन घटना घडल्या. तसेच तुपसाखरे लॉन्स येथे सोनसाखळी ओरबाडून पलायन केलेल्या संशयिताला लगेचच अटक करण्यात आली. भद्रकाली परिसरात एका महिलेची सोन्याची पोत चोरीला गेली, मात्र त्याची पोलिसांत अद्यापही नोंद नाही. त्यामुळे पोत ओरबाडली की गहाळ झाली याबाबत अद्यापही साशंकता असून, महिलेने पोलिसांत तक्रार दिलेली नाही. गेल्या महिनाभरात आतापर्यंत सुमारे 15 सोनसाखळीचोरीच्या घटना घडल्या. 

सोनसाखळी ओरबाडल्याच्या तीन घटना घडल्या असून, दोन पथके तयार करून संशयितांच्या मागावर रवाना झाली आहेत. यात्रोत्सवातही पोलिसांकडून चोख बंदोबस्त ठेवतानाच महिलांची जनजागृती करण्याचा प्रयत्न केला जात आहे. त्यामुळे यात्रोत्सवामध्ये अद्याप चोरीचा प्रकार घडलेला नाही. 
-अशोक नखाते, सहाय्यक आयुक्त, गुन्हे शाखा