नाशिक : (कसबे सुकेणे) बाबा आमटे यांनी कुष्ठरुग्णांसाठी चंद्रपूर येथे सुरू केलेले आनंदवन व सोमनाथ, डॉ. प्रकाश आमटे यांनी स्थापन केलेले गडचिरोली येथील माडिया गोंड या आदिवासींसाठी स्थापन केले हेमलकसा आदी ठिकाणी निफाड व दिंडोरी तालुक्‍यातून यंदा सात ते आठ क्विंटल द्राक्ष रवाना झाली आहेत.

द्राक्षही कधी पाहिलेली नव्हती

2013-14 या वर्षापासून निफाड व दिंडोरी तालुक्‍यांतून दर वर्षी द्राक्ष याठिकाणी पाठवले जातात. सुरवातीला 50 द्राक्षपेट्या पाठवली जाणारी द्राक्षे आज सात ते आठ क्विंटलपर्यंत जाऊन पोचली आहेत. आनंदवन व सोमनाथ येथे कुष्ठरुग्ण, अंध व अपंग आश्रयास आहेत. तर हेमलकसा येथील माडिया गोंड ही आदिवासी जमात तर खूपच मागासलेली आहे. त्यांनी द्राक्षही कधी पाहिलेली नव्हती. अगदी सुरवातीला मौजे सुकेणे येथील सचिन टिपले यांनी 2013-14 मध्ये प्रथमच आनंदवनाला भेट दिली व आपणही या लोकांचे काहीतरी देणे लागतो, या भावनेतून त्यांनी कसबे सुकेणे येथील आपले मित्र छगन जाधव, बाळासाहेब जाधव, महेश मोगल, शरद जाधव यांच्या निदर्शनास ही बाब आणली.

एकत्रित केलेली सर्व द्राक्षे होता रवाना

पुढील वर्षापासून या सर्वांनी द्राक्षाचे संकलन करून स्वखर्चाने ही द्राक्षे रेल्वेमधून त्याठिकाणी पोहचवली. त्यानंतर या युवकांनी निफाड तालुक्‍यातील साकोरे मिग येथील बोरस्ते, दिंडोरीमधील तीसगाव येथील भालेराव, बोपेगाव येथील कावळे, सोनजांब येथील जाधव, जवळके येथील पाटील या आपल्या मित्रांनाही या प्रवाहात सहभागी करून घेतले. या माध्यमातून जास्तीत जास्त शेतकरी जोडणे व आता तर दर वर्षीच ही द्राक्षे पाठवली जातीत. त्यासाठी आनंदवन येथील सेवाभावी संस्थेचे वाहन याठिकाणी बोलवले जाते. ही एकत्रित केलेली सर्व द्राक्षे या वाहनांतून तेथे पोहचवली जातात. 

हेही वाचा > PHOTO : मुंबईत बसूनही त्याचे गोठ्यावर लक्ष!...हायटेक तरुणाची हायटेक 'करामत'...  

मागासलेल्या व पीडित समाजासाठी आपणही काहीतरी देणे लागतो, या भावनेतून द्राक्ष संकलनाची योजना सुरू केली. पन्नास द्राक्ष पेट्यांपासून सुरू झालेली योजना आज आठ क्विंटलपर्यंत पोहचली आहे. अर्थात, याकामी अनेक द्राक्षउत्पादक शेतकरी मित्रांचे सहकार्य लाभले आहे. भविष्यातही अधिकाधिक मित्र जोडून द्राक्षांचा पुरवठा केला जाईल. - छगन जाधव, कसबे सुकेणे  

हेही वाचा > सिमेंटच्या जंगलात 'पारव्याची जोडी' घुमे गुटर्रघुम...!