नाशिक रोड : विहितगाव येथील रहिवासी आणि राष्ट्रवादी काँग्रेसचे पदाधिकारी विक्रम कोठुळे यांना चौघांनी कोयते व अन्य शस्त्रांच्या मदतीने धमकी दिली व कोठुळे यांच्या घरावर दगडफेक केली. या प्रकरणी उपनगर पोलिस ठाण्यात गुन्हा दाखल झाला आहे. या दहशतीमुळे नाशिक रोडला काही काळ तणावाचे वातावरण होते. वाढत्या गुंडगिरीचा तातडीने बंदोबस्त करण्याची मागणी नागरिकांनी केली आहे. पक्षाच्या पदाधिकाऱ्यांनी उपनगर पोलिसांची भेट घेतली असून, हल्लेखोरांना कडक शासन व्हावे, यासाठी पोलिसांकडे कारवाई करण्याची मागणी केली आहे. (Attack-on-NCP-activists-house-marathi-news-jpd93)

राष्ट्रवादीच्या पदाधिकाऱ्यांच्या घरावर हल्ला

उपनगर पोलिस ठाण्यात विक्रम रामदास कोठुळे यांनी दिलेल्या फिर्यादीवरून गुन्हा दाखल झाला आहे. कोठुळे विहितगाव येथील मरीमाता मंदिरासमोरील सुंदराई निवास येथे राहतात. रविवारी (ता. २५) रात्री साडेअकराला कोठुळे यांच्या घरासमोर कार (एमएच १५, एके १०८६) थांबली. त्यातून प्रशांत बागूल (रा. बागूलनगर), विक्रम गवळी (रा. विहितगाव बुद्धविहाराजवळ), राहुल बनकर (रा. बागूलनगर), विकी हांडोरे (रा. प्राइड सोसायटी, विहितगाव नाका) उतरले. विक्रम कोठुळे यांच्या घरावर दगड फेकले. ते सर्व जण विक्रम कोठुळे यांच्या नावाने शिवीगाळ करून, ‘तू बाहेर ये, तुझ्याकडे बघायचे आहे,’ असे म्हणून निघून गेले. थोड्या वेळाने कोठुळे घराबाहेर आले असता, पुन्हा चौघे संशयित कारमधून आले. त्यांच्या हातात कोयते होते. बळजबरीने त्यांनी कोठुळे यांच्या बंगल्याचे गेट उघडून दहशत माजविली. काही जण घरात घुसले. विक्रम यांच्या आई व पत्नीने संशयितांना बाहेर काढले. संशयितांनी कोठुळे यांच्या घरावर दगड फेकून दहशत माजविली. कोठुळे यांनी उपनगर पोलिसांना भ्रमणध्वनीवरून घटनेची माहिती दिली. पोलिस घटनास्थळी दाखल झाले. सोमवारी (ता. २६) सकाळी राष्ट्रवादीचे शहराध्यक्ष रंजन ठाकरे, निवृत्ती अरिंगळे, मनोहर कोरडे, मिलिंद पगारे आदींनी उपनगरचे वरिष्ठ पोलिस निरीक्षक अनिल शिंदे यांची भेट घेऊन कोठुळे यांच्या घरावर हल्ला करणाऱ्यांवर कारवाईची मागणी केली.