नाशिक रोड : जेल रोड परिसरातील नारायण बापू नगर येथे बुधवारी (ता. २१) पहाटे पार्किंगच्या वादातून चार ते पाच जणांच्या टोळक्याने चारचाकी गाड्यांची तोडफोड केली. याप्रकरणी उपनगर पोलिस ठाण्यात गुन्हा दाखल करण्यात आला असून, उपनगर पोलिसांनी चार जणांना अटक केली आहे.

या प्रकारामुळे जेलरोड परिसरात घबराट निर्माण झाली असून संबंधित टोळक्याने दहशत निर्माण व्हावी म्हणून गाड्यांची तोडफोड केली असल्याचे समजते. गाड्यांची तोडफोड झाल्याचे समजताच परिसरातील नागरिक मोठ्या संख्येने जमा झाले व त्यांनी संबंधित संशयितांवर कडक कारवाई करण्याची मागणी केली. याबाबत पुढील तपास वरिष्ठ निरीक्षक नीलेश माईनकर यांच्या मार्गदर्शनाखाली सुरू आहे.