निफाड (जि. नाशिक) : आधीच दोन वर्षांपासून निफाड तालुक्यातील शेतकरी कोरोना (Corona) संकटाशी दोन हात करीत असतानाच बदलते नैसर्गिक वातावरण शेती आणि शेतकऱ्यांच्या मुळावर उठले आहे. कधी थंडी, तर कधी ढगाळ हवामान, पावसामुळे द्राक्ष बागायतदार मेटाकुटीस येत आहेत. मंगळवारी (ता. ३०) सकाळपासून ढगाळ हवामान तयार झाल्याने द्राक्ष बागायतदार हबकले आहेत.

औषधांच्या फवारणीच्या खर्चात दीडपट वाढ

निफाड तालुक्यातील जवळपास २५ हजार हेक्टर क्षेत्रावर सध्या द्राक्षबागांची मशागत व पोषक अन्नद्रव्य देण्याबरोबरच रोगप्रतिबंधासाठी औषधांची फवारणी केली जात आहे. अशातच द्राक्षांवर फवारणी औषधांच्या किमतीत दीडपट वाढ झाल्याने शेतकऱ्यांसमोर आर्थिक संकट उभे राहिले आहे. त्यातच हवामान बदलाने द्राक्षबागांवर रोगराईचा प्रादूर्भाव अन्‌ उत्पादनावर परिणामाची शक्यता व्यक्त होत आहे. कोवळ्या फुटींवरील द्राक्षमालावर डाऊणी, तसेच मणी धरत असलेल्या द्राक्षमालाला‌ भुरी या बुरशीजन्य रोगांसाठी ढगाळ हवामान पोषक आहे. त्यावर प्रतिबंधात्मक बुरशीनाशक औषधांची फवारणी केली जात आहे. पाऊस झाला, तर फुलोरा अवस्थेतील द्राक्षमालाची घडकुज व मणीगळ होणार आहे.

''काही दिवसापासून बदलत्या नैसर्गिक वातावरणामुळे निफाड तालुक्यातील द्राक्ष शेती संकटांचा मुकाबला करीत आहेत. द्राक्ष शेतीचा हंगाम भरात आला असताना, बदलते वातावरण शेतकऱ्यांची चिंता वाढवणारा आहे. मात्र, अशाही परिस्थितीत योग्य नियोजन करत आम्ही द्राक्षबागा वाचविण्यासाठी प्रयत्न करीत आहोत.'' - बाबूराव सानप, द्राक्ष उत्पादक शेतकरी, सोनेवाडी बुद्रुक