नाशिक : कोरोना प्रादुर्भावाच्‍या वाढीच्‍या दृष्टीने ग्रामीण भाग संवेदनशील ठरत आहे. बुधवारी (ता.२७) जिल्‍ह्यात ६४ रुग्‍णांचे कोरोनाचे अहवाल पॉझिटिव्‍ह आले असून, यापैकी ३३ बाधित हे नाशिक ग्रामीण भागातील आहेत. दरम्‍यान ७३ रुग्‍णांनी कोरोनावर यशस्‍वीरीत्‍या मात केली. एका बाधिताचा उपचारादरम्‍यान मृत्‍यू झाला. सद्यःस्‍थितीत जिल्‍ह्यात ७२५ बाधितांवर उपचार सुरु आहेत.

बुधवारी नाशिक महापालिका क्षेत्रात २६ तर नाशिक ग्रामीणमध्ये ३३ रुग्‍णांना कोरोनाची लागण झाल्‍याचे निदान झाले. मालेगाव महापालिका क्षेत्रात दोन तर जिल्‍हा बाहेरील तिघांचे अहवाल पॉझिटिव्‍ह आले. गेल्‍या दोन दिवसांपासून जिल्‍ह्यातील मृतांचा आकडा वाढला होता. त्‍यातच बुधवारी एका बाधिताच्‍या मृत्‍यूची नोंद असून, मृत हा नाशिक ग्रामीण क्षेत्रातील आहे.
सायंकाळी उशीरापर्यंत ७६१ रुग्‍णांना अहवालाची प्रतीक्षा होती. यापैकी नाशिक ग्रामीणच्‍या ४९०, मालेगावच्‍या १४९ तर नाशिक शहरातील १२२ रुग्‍णांचे अहवाल प्रलंबित होते. जिल्‍हाभरातील रुग्‍णालये व गृहविलगीकरणात ३७४ रुग्‍ण दाखल झाले. यापैकी ३६५ रुग्‍ण हे नाशिक महापालिका क्षेत्रातील होते. जिल्‍हा रुग्‍णालयात एक रुग्‍ण दाखल झाला. नाशिक ग्रामीणमधील आठ रुग्‍णांचा समावेश होता.