नाशिक : कोरोना प्रतिबंधक लसीकरण मोहिमेची गती वाढू लागली आहे. मंगळवारी (ता. २७) जिल्‍ह्यात ३० हजार ९३६ नागरिकांचे लसीकरण झाले. यातून आतापर्यंत जिल्‍ह्यात लसीकरण झालेल्‍या नागरिकांच्या संख्येने १८ लाखांचा आकडा ओलांडला आहे. (corona vaccination crosses 18 lakh mark in Nashik district)

राज्‍याप्रमाणे जिल्‍ह्यात कोरोनाची दुसरी लाट आली. जुलै महिन्‍यात कोरोना प्रादुर्भाव काहीसा नियंत्रणात आला आहे. असे असताना संभाव्‍य तिसऱ्या लाटेच्‍या पार्श्वभूमीवर नागरिक लसीकरणाला सकारात्‍मक प्रतिसाद देत आहेत. मंगळवारी जिल्‍ह्यात ३० हजार ९३६ नागरिकांचे लसीकरण करण्यात आले. यासोबत जिल्‍ह्यात लसीकरण करून घेतलेल्‍या नागरिकांची संख्या १८ लाखांहून अधिक झाली आहे.

आतापर्यंत १८ लाख १३ हजार ४०२ नागरिकांचे लसीकरण झाले आहे. यापैकी १३ लाख ६३ हजार ४१८ नागरिकांनी लशीचा पहिला डोस घेतला आहे, तर चार लाख ४९ हजार ९८४ नागरिकांनी लशीचे दोन्‍ही डोस घेतले आहेत. आगामी काळात लसीकरण मोहिमेला आणखी गती दिली जाणार असून, रोज ५० हजार नागरिकांचे लसीकरण करण्याचे उद्दिष्ट जिल्‍हा प्रशासनाने ठेवले आहे. यापूर्वी एका दिवशी ४० हजारांपर्यंत लसीकरण करण्यात आले होते. मात्र, लशीच्‍या उपलब्‍धतेमुळे लसीकरण मोहिमेची गती प्रभावित होत आहे.

(corona vaccination crosses 18 lakh mark in Nashik district)