Nashik News : शहरात ठिकठिकाणी लावण्यात आलेल्या दिशादर्शक फलकांवर महापालिकेकडून परवानगी अथवा कर न भरता राजकीय पुढाऱ्यांकडून सर्रास बॅनरबाजी केली जात आहे.

येथील दत्तमंदिर सिग्नलच्या जवळ असणाऱ्या बॅनरवर सध्या राजकीय पुढाऱ्‍यांनी अनधिकृत शुभेच्छा फलक लावले आहे.

तसेच बिटको चौकातही अनधिकृत शुभेच्छा फलक सध्या नागरिकांच्या चर्चेचा विषय ठरत आहे. महापालिका मात्र अनधिकृत फलकांकडे सर्रास डोळेझाक करताना दिसत आहे. (Directional boards covered by banners Nashik News)

नाशिक रोड हे पंचवटी मतदारसंघाबरोबरच देवळाली मतदारसंघ व नाशिक मध्य मतदारसंघाचे प्रवेशद्वार समजले जाते. यामुळे अनधिकृत बॅनरबाजी करणाऱ्या पुढाऱ्‍यांची संख्या नाशिक रोडमध्ये मोठ्या प्रमाणावर आहे.

येणाऱ्या निवडणुका डोळ्यासमोर ठेवून राजकीय पुढाऱ्यांची बॅनर लावण्याची स्पर्धा सुरू असल्याचे दिसून येत आहे. याकडे मनपा प्रशासनाचे दुर्लक्ष होताना दिसते आहे.

हेही वाचा : Credit Card फसवणूक....काय घ्याल काळजी?

एका बाजूला स्मार्टसिटीच्या दिशेने नाशिकची वाटचाल होत असताना मनपाचे कररूपी लाखो रुपयाचे नुकसान होत आहे. नाशिक - पुणे महामार्गावरील प्रवास करणाऱ्या वाहनचालकांना आणि प्रवाशांना दिशादर्शक फलक दिसत नाही.

पर्यायाने अनेक वेळा वाहने रस्ता चुकत आहे. बिटको चौक, छत्रपती शिवाजी महाराज चौक, डॉ. बाबासाहेब आंबेडकर चौक, दत्तमंदिर चौक, सिन्नर फाटा, सैलानी बाबा चौक, अनुराधा चौक, दत्तमंदिर रोडवरील जैन मंदिर चौकात स्वयंघोषित पुढाऱ्यांकडून सध्या होर्डिंगची स्पर्धाच सुरू आहे.

यामुळे संपूर्ण नाशिक रोड परिसराचे विद्रूपीकरण झाले असल्याने नागरिकांनी नाराजी व्यक्त केली आहे.