नाशिक : जिल्हा नियोजन समितीचा नाशिक जिल्‍ह्याचा ५३.१२ कोटींचा निधी केवळ तांत्रिक अडचणींमुळे शासनास परत गेला असल्याचे जिल्हा नियोजन अधिकारी किरण जोशी यांनी म्हटले आहे. दरम्यान, निधी परत गेल्याने राज्यात नाशिक जिल्ह्याची निधी खर्चाची कामगिरी एकदम सुमारे, म्हणजेच राज्यात ३६ व्या क्रमाकांची राहीली.

राज्यातील एकुण ३६ जिल्ह्यांमध्ये नाशिकचा (Nashik) क्रमांक सर्वांत शेवटचा म्हणजेच ३६ वा आहे. नाशिकचा ५३ कोटीहून अधीक निधी परत गेल्याचे वृत्त ‘सकाळ’मध्ये यापूर्वी प्रसिद्ध झाले होते. त्यावर विभागीय आयुक्तांनी याविषयी जिल्हा प्रशासनाकडून (District Administration) अहवाल मगितला होता. या सगळ्या पार्श्‍वभूमीवर जिल्हा नियोजन आधिकारी श्री. जोशी यांनी प्रथमच प्रसारमाध्यमांशी संवाद साधला, तसेच निवेदन प्रसिद्धीस दिले आहे. त्यात, केवळ तांत्रिक अडचणींमुळे जिल्हा वार्षिक सर्वसाधारण योजनेचा ५३.१२ कोटी रुपयांचा निधी शासनास परत गेला असल्याचे म्हटले आहे.