नाशिक : लाचप्रकरणात जिल्हा परिषदेच्या माध्यमिक शिक्षणाधिकारी डॉ. वैशाली वीर- झनकर यांना न्यायालयाने आणखी दोन दिवसांची पोलिस कोठडी सुनावली आहे. शिक्षण संस्थेच्या शाळांना मंजूर झालेल्या २० टक्के अनुदानाप्रमाणे शिक्षकांना नियमित वेतन सुरू करण्यासाठी लाचलुचपत प्रतिबंधक विभागाने आठ लाखांची लाच घेताना सापळा लावून पकडले होते.

शुक्रवारी (ता. १३) त्यांना एक दिवसाची पोलिस कोठडी सुनावण्यात आली होती. त्यानुसार शनिवारी (ता. १४) पुन्हा न्यायालयात उपस्थित केले असता न्यायालयाने आणखी दोन दिवसांची पोलिस कोठडी सुनावली. या वेळी सरकारी वकील सचिन मोराडकर यांनी डॉ. वीर- झनकर यांच्या आवाजाच्या नमुन्याची तपासणी, घरझडतीत सापडलेल्या गोष्टींची शहानिशा करण्यासाठी पोलिस कोठडी मागितली. दरम्यान, याच प्रकरणी अटकेत असलेल्या चालक ज्ञानेश्‍वर येवले व शिक्षक पंकज दशपुते यांना न्यायालयीन कोठडी सुनावण्यात आली आहे.

निलंबनाचा मंगळवारी फैसला शक्‍य

दरम्यान, या प्रकरणात संशयित वाहनचालक ज्ञानेश्‍वर येवले यास यापूर्वीच निलंबित करण्यात आले आहे. त्‍यापाठोपाठ शनिवारी संशयित शिक्षक पंकज दशपुते यास जिल्‍हा परिषदेच्‍या सीईओंनी निलंबित केले. या दोन्‍ही कारवाया स्‍थानिक पातळीवर झाल्‍या. मात्र, शिक्षणाधिकारी वैशाली वीर-झनकर यांच्या विरोधात वरिष्ठ पातळीवरून निलंबनाची कारवाई होणार आहे. यासंदर्भात शिक्षण उपसंचालक कार्यालयामार्फत प्रस्‍तावही पाठविण्यात आला आहे. ४८ तासांहून अधिक कालावधीसाठी पोलिस कोठडीत असल्‍याने झनकरांचे निलंबन अटळ आहे. मात्र, रविवारी (ता. १५) स्‍वातंत्र्यदिन व रविवार आणि सोमवारी (ता. १६) पतेतीनिमित्त शासकीय सुटी आहे. त्‍यामुळे मंगळवारी (ता. १७) निलंबनाचे आदेश जारी होण्याची शक्‍यता आहे. दरम्‍यान, या कारवाईनंतर माध्यमिक शिक्षणाधिकारी पदाचा पदभार अद्याप अन्‍य अधिकाऱ्यांकडे सुपूर्द केलेला नाही. अशात निलंबनाच्‍या आदेशासोबत प्रभावी कार्यभार असलेल्‍या व्‍यक्‍तीचे नाव जाहीर केले जाण्याची शक्‍यता आहे.