मालेगाव (नाशिक) : कृषी विभागाने महा-डीबीटी पोर्टलवर ‘शेतकरी योजना’ या माध्यमातून शेतकऱ्यांना सर्व योजनांचा लाभ एकाच अर्जाद्वारे देण्यासाठी अर्ज करण्यापासून ते प्रत्यक्ष लाभ मिळेपर्यंत एकत्मिक संगणकीय प्रणाली विकसित केलेली आहे. या प्रणालीद्वारे महा-डीबीटी पोर्टलवर नोंदणी करण्यासाठी ११ जानेवारीपर्यंत मुदतवाढ देण्यात आली आहे. शेतकऱ्यांनी मुदतवाढीचा लाभ घेत नोंदणी करावी, असे आवाहन उपविभागीय कृषी अधिकारी दिलीप देवरे यांनी केले आहे.

लाभासाठी नोंदणी करण्याचे आवाहन 
 
महा-डीबीटी पोर्टलचे https://mahadoimahat.gov.in हे संकेतस्थळ असून, या संकेतस्थळावर नोंदणी करण्यासाठी ‘शेतकरी योजना’ हा पर्याय निवडावा. शेतकरी स्वत:च्या मोबाईल, संगणक/ लॅपटॉप/ टॅबलेट, सामुदायिक सेवा केंद्र (CSC), ग्रामपंचायतीतील संग्राम केंद्र आदी माध्यमातून वरील संकेतस्थळावर जाऊन अर्ज करू शकतील. वैयक्तिक लाभार्थी म्हणून नोंदणी करणाऱ्या सर्व शेतकऱ्यांना त्यांचा आधार क्रमांक संकेतस्थळावर प्रमाणित करून घ्यावा लागेल. ज्या वापरकर्त्याकडे आधार क्रमांक नसेल, त्यांनी प्रथम आधार नोंदणी केंद्राकडे जाऊन त्यांची नोंदणी करावी. 

हेही वाचा>  गॅस गिझर भडक्यात बाथरूममध्ये तरुणाचा गुदमरून मृत्यू; नववर्षाच्या पहिल्याच दिवशी पाटील कुटुंबात आक्रोश

अनुदान वितरण करण्याची प्रक्रिया ऑनलाइन

नोंदणी क्रमांक महा-डीबीटी पोर्टलमध्ये नमूद करून त्यांना योजनांसाठी अर्ज करता येईल. अशा अर्जदारांना अनुदान वितरित करण्यापूर्वी महा-डीबीटी पोर्टलमध्ये त्यांना देण्यात येणारा आधार क्रमांक नोंदणीकृत करून प्रमाणित करून घ्यावा लागेल. त्याशिवाय अनुदानाचे वितरण करण्यात येणार नाही. पोर्टलवरील प्राप्त अर्जाची ऑनलाइन लॉटरी, पूर्व संमती देणे, मोका तपासणी, तसेच निवड झालेल्या लाभाधारकांच्या खात्यावर थेट अनुदान वितरण करण्याची सर्व प्रक्रिया ऑनलाइन होणार आहे. ज्या अर्जदारांनी यापूर्वी माहिती भरली असल्यास त्यांनी पुन्हा माहिती भरण्याची आवश्यकता नाही. लाभाच्या घटकांमध्ये शेतकरी बदल करू शकतात. मुदतीत आलेले सर्व अर्ज लॉटरीसाठी ग्राह्य धरले जातील.  

हेही वाचा>  दिव्यांग पित्याचे मुलाला अभियंता बनविण्याचे डोळस स्वप्न; कॅलेन्डर विक्रीतून जमवताय पै पै, असाही संघर्ष