वणी (जि. नाशिक) : येथील लक्ष्मीनगर लगत असलेल्या शेतातील गवताच्या गंजीला आग लागली. या आगीत ५४ वर्षीय व्यक्तीचा जळून मृत्यू झाल्याची घटना घडली असून वणी पोलिसांत अकस्मात मृत्युची नोंद करण्यात आली आहे. आगीचे कारण स्पष्ट होऊ शकलेले नसून पोलिस याबाबत तपास करत आहेत.

येथील देवनदीजवळील लक्ष्मीनगर लगत असलेल्या मनोहर पवार यांच्या शेतात रचून ठेवलेल्या वाळलेल्या गवताच्या गंजीस बुधवारी (ता. २३) रोजी रात्री साडे नऊ वाजेच्या सुमारास आग लागली. यावेळी परीसरातील रहिवाशांनी पाण्याच्या बादल्यांनी आग विझवण्याचा प्रयत्न केला. याचवेळी पोलिसांनाही रहिवाशांनी घटनेची माहिती कळविल्यानंतर पोलिसांनी घटनास्थळी दाखल होत आग आटोक्यात आणण्याचा प्रयत्न केला. या आगीत गवताच्या गंजीतून शेत मालक मनोहर पुंडलीक पवार (वय ५४, रा. वणी) यांना जळालेल्या अवस्थेत बाहेर काढले असता, त्यांना येथील ग्रामिण रुग्णालयात दाखल केले. वैद्यकिय अधिकाऱ्यांनी त्यांना तपासून मयत घोषित केले. याबाबत वणी पोलिसांत नामदेव पुंडलिक पवार (वय, ४३) यांनी दिलेल्या खबरीवरून अकस्मात मृत्युची नोंद करण्यात आली असून आगीचे व मृत्युच्या कारणांचा पोलिस तपास करीत आहे.