Farmers Seed Purchase : खरीप हंगाम जवळ आल्याने पेरणीसाठी शेतकऱ्यांची बियाणे खरेदीसाठी अधिकृत कृषी केंद्रांवर लगबग सुरु झाल्याचे चित्र इगतपुरी तालुक्यातील अर्थवाहिनी समजल्या जाणाऱ्या घोटी बाजारपेठेत पाहायला मिळत आहे.

हवामान खात्याने वेळेत पर्जन्यमान होणार असल्याचे सांगितले असून तसे चित्र अजून स्पष्ट झालेले नसल्याने चिंतेत भर पडली आहे. (Farmers seed purchase rush Be careful while buying nashik news)

यंदा खरीप हंगामातील पेरण्यांनी जून महिन्याच्या सुरवातीलाच बियाणे पेरण्याची सुरवात केल्याचे दिसत आहे. कृषी क्षेत्रात यांत्रिकीकरणाबरोबरच तंत्रज्ञानाचा वापर होताना दिसत आहे. आधुनिक तंत्रज्ञानामुळे हवामानाचा अंदाज येत असल्याने पिकांचे नुकसान देखील कमी होत आहे.

शेतकरी बियाणाची खरेदी महाडीबीटीवर ऑनलाइन पद्धतीने करू शकतो. शेतकऱ्यांनी बियाणांची खरेदी करताना पक्की पावती घ्यावी. बियाणांचे वेष्टण, पिशवी, टॅग, खरेदीची पावती व पाकिटातील थोडे बियाणे पिकाची कापणी होईपर्यंत जपून ठेवावी.

भेसळीची शंका दूर करण्यासाठी बियाणांचे पाकिट सिलबंद व मोहोरबंद असल्याची खात्री करावी. त्याच बरोबर पाणी पडल्यावरच बियाणे टाकावी अशी सूचना तालुका आरोग्य अधिकारी शीतलकुमार तंवर यांनी केले आहे.

हेही वाचा : Credit Card फसवणूक....काय घ्याल काळजी?

पाकिटावरील बियाणे वापरण्याची अंतिम मुदत व किंमत तपासून घ्यावी. तसेच, बियाणे बोगस निघाल्यास शेतकऱ्यांनी राज्यस्तरीय नियंत्रण कक्ष दूरध्वनी टोल फ्री १८००२३३४००० या क्रमांकावर संपर्क साधण्याचे आवाहन कृषी विभागाने केले आहे.

"आदिवासी शेतकऱ्यांच्या अज्ञानाचा गैरफायदा घेत बोगस कंपन्यांचे प्रतिनिधी शेतकऱ्यांना घरोघरी जाऊन प्रलोभने दाखवून बियाणे खरेदी करण्याची गळ घालताना दिसतात. बियाण्यांची खरेदी करताना अधिकृत कृषी केंद्र विक्रेत्यांकडूनच खरेदी करावी."

- सोमनाथ काळे, अध्यक्ष, कृषी केंद्र असोसिएशन, इगतपुरी