नाशिक : दिल्ली येथून नाशिकमध्ये परतलेल्या 14 जणांचा शोध लागला असून, यातील एक विद्यार्थिनी तिच्या घरातच, तर उर्वरित 13 जणांना तपोवनातील महापालिकेच्या रुग्णालयात क्वारंटाइन करण्यात आलेले आहे. दिल्लीतून 21 जण आल्याची चर्चा असल्याने याबाबत पोलिस प्रशासनाने शोध घेतला असता सात जण परराज्य व परजिल्ह्यातील आहेत. यंत्रणेला 14 जणांना शोधण्यात यश आले आहे. नाशिक शहर-जिल्ह्यात 32 जण आल्याची चर्चा होती. यातील 11 जण मालेगाव, येवला, निफाड आणि सिन्नर तालुक्‍यातील असल्याचे ग्रामीण पोलिसांकडून सांगण्यात आले. 

मालेगाव, येवला, निफाड, सिन्नर तालुक्‍यातील 11 जण
दिल्ली येथे एका तबलिगी जमात कार्यक्रमात सहभागी झालेले 32 जण नाशिक जिल्ह्यात दाखल झाल्याची चर्चा होती. याच कार्यक्रमात सहभागी झालेल्या मुंबईतील एका वृद्धाचा मृत्यू कोरोनामुळे झाल्याने जिल्हा प्रशासनासह आरोग्य व पोलिस यंत्रणेसमोर मोठे आव्हान उभे राहिले होते. त्यामुळे पोलिस व आरोग्य यंत्रणेने शोधमोहीम हाती घेतली. दिल्लीतील या कार्यक्रमात सहभागी झालेल्या 32 पैकी सात जण परजिल्हा व परराज्यातच असल्याचे तपासात समोर आले आहे. या सात जणांतील तिघे दिल्लीत, एक पुण्यात, एक मुंबईत, एक हरियानात, तर एक उत्तर प्रदेशात आहे. 

दिल्लीतून आलेले 14 कोरोना संशयित क्वारंटाइनमध्ये

 दरम्यान, नाशिक शहरात असलेल्या 14 जणांचा पोलिस व आरोग्य यंत्रणेने शोध घेतला. यातील सात हिंदू, तर सात जण मुस्लिम आहेत. यांच्यातील एक युवती शिक्षणानिमित्त गुडगाव येथे असते. मात्र कोरोनामुळे वातावरण दूषित झाल्याने ती 12 ते 16 मार्चदरम्यान नाशिकमध्ये आली आहे. तेव्हापासून ती होम क्वारंटाइन आहे. 12 ते 19 मार्चदरम्यान नाशिकमध्ये आलेल्या उर्वरित 13 जणांचीही आरोग्य यंत्रणेने तपासणी केली. त्यांना तपोवनातील महापालिकेच्या रुग्णालयात क्वारंटाइन करण्यात आलेले आहे.

हेही वाचा > #Lockdown : ...अन् अडकलेल्या 'त्या' गर्भवतीच्या मदतीला 'ते' देवदूतासारखे धावून आले!

यातील काही जण व्यावसायिक असून, त्याच निमित्ताने दिल्लीला गेले होते. तबलिगी जमात कार्यक्रमात केवळ तिघेच सामील झाल्याचे तपासातून समोर येत आहे. मात्र सध्या साऱ्यांची प्रकृती स्थिर असून, त्यांना कोणतीही संशयित लक्षणे नाहीत. तरीही त्यांना तपोवनातील महापालिका रुग्णालयात क्वारंटाइन करण्यात आलेले आहे. नाशिक जिल्ह्यात 11 जण असून, हे मालेगाव, येवला, निफाड, सिन्नर तालुक्‍यातील आहेत. या साऱ्यांना ग्रामीण पोलिस व आरोग्य यंत्रणेने होम क्वारंटाइन करण्यात आलेले आहे. 

हेही वाचा > होम क्वारंटाईन झालेले बच्चू कडू म्हणतात.. "भावांनो हात जोडतो, घरीच थांबा" बाहेर पडू नका,