Gatari Amavasya 2023 : सोमवती अमावस्येला सोमवार आल्याने नॉनव्हेज खवय्यांनी रविवारीच नॉनव्हेजला पसंती दिली.

त्यामुळे शहरासह उपनगरातही मटण, चिकन खरेदीसाठी सकाळपासून चक्क रांगा लागल्या होत्या. अनेकांनी चिकनला पसंती दिल्याने तेथेही खरेदीसाठी झुंबड उडाली होती. (Gatari Amavasya 2023 Sunday feast for non veg foodies nashik)

दीप अमवस्यानंतर अधिक मासाला प्रारंभ होणार आहे. त्यामुळे खवय्यांनी रविवारीच मटण चिकण, मासे, अंडे यावर ताव मारला. त्यामुळे शहरातील मटण, चिकनच्या दुकानावर चांगलीच गर्दी झाल्याचे चित्र होते.

यंदा महागाईचा फटका मासांहाराला बसला आहे. मटण प्रति ७५० ते ८०० रुपये किलोप्रमाणे विकले जात होते. तर तर चिकन २५० ते ३०० रुपये किलो प्रमाणे विकले जात होते. यंदा दीप अमावस्या सोमवारी आल्याने खवय्यांनी रविवारचा मुहूर्त साधत मांसाहारावर ताव मारला.

तसेच मासांहाराप्रमाणे मद्यपींची मद्य खरेदीसाठी ठिकठिकाणच्या बिअर बार व दारू दुकानात गर्दी झाली होती. रविवारचा वार खवय्यांसाठी पर्वणी ठरला. हॉटेल व्यवसायिकांसह मांसाहार विक्रेत्यांची दुकाने गर्दीने फुलली होती.

देशी-विदेशी मद्याच्या दुकानांमध्ये मोठ्या प्रमाणावर गर्दी होती. काहींनी शहराच्या आसपासचे पर्यटनस्थळ व पिकनिक स्पॉट निवडून तेथे कुटुंबासह मांसाहाराचा आस्वाद घेतला. सायंकाळी नाशिकच्या ढाबा व बारमध्ये मोठ्या प्रमाणावर गर्दी पाहायला मिळाली.

नाशिकच्या प्रसिद्ध मांसाहारी खानावळी सोमवारी बंद असतात. मात्र रविवारीच त्यांनी छप्पर फाडके व्यवसाय केल्याची चर्चा ग्राहकांमध्ये होती. दरम्यान, सायंकाळी मच्छीचे भाव गगनाला भिडले होते.

हेही वाचा : Credit Card फसवणूक....काय घ्याल काळजी?

मुंबईहून येणारी वांब, पापलेट, कोळंबी, ओले बोंबील, सुकट, सुके बोंबील यांनाही मागणी मोठ्या प्रमाणात वाढली होती. पर्यटन आणि मांसाहार नाशिककरांनी रविवारीच अनुभवल्यामुळे सोमवारी गटारी कशी साजरी होते, याकडे लोकांचे लक्ष लागून आहे.

"प्रत्येक रविवारच्या तुलनेत या रविवारी मोठ्या प्रमाणावर ग्राहकांनी गर्दी केली होती. सोमवारची गटारी रविवारीच साजरी करण्यासाठी अनेकांनी मासे खरेदी केले. मच्छीला मागणी मोठ्या प्रमाणावर होती." - लखन चव्हाण, मासे विक्रेते

मांसाहाराचे किलोचे भाव

मटन ७००-८००, गावठी कोंबडी- ४००-६००, कटला-३००, कोंबडा मासा- ३२०, मरळ नदीतील - ५००, मरळ समुद्रातील - १२००, वांब गावठी ६००, वांब समुद्रातील १२००, पापलेट -५००-७००, तिलापिया - १६०-१८०, रोहू -४००,चोपडा -४००-५००, सुरमई -५००-६००, मुऱ्या नदीतील - ६००-७००, खेकडा (प्रकारानुसार)- ३००-६००,कोळंबी - ३००-४५०.