नाशिक : कोरोनाच्या तिसऱ्या संभाव्य लाटेचा (corona third wave) धोका लक्षात घेता ॲलोपॅथीबरोबरच आयुष मंत्रालयाने दिलेल्या निर्देशानुसार होमिओपॅथी (homeopathy) व आयुर्वेदिक (aayurveda) औषधांचा साथ रोग उपचारात समावेश करावा अशा सूचना आरोग्य विभागाने दिल्या आहेत. महापौर सतीश कुलकर्णी (mayor satish kulkarni) यांनी यासंदर्भात शासनासोबत पत्रव्यवहार केल्याच्या पार्श्वभूमीवर या सूचना देण्यात आल्याचा दावा त्यांनी केला.

कोरोनावर उपचारासाठी आता होमिओपॅथी व आयुर्वेदिकही

कोरोनाच्या पहिल्या व दुसऱ्या लाटेमध्ये ऑक्सिजन व व्हेंटिलेटर बेड उपलब्ध होत नसताना ॲलोपॅथीबरोबरचं होमिओपॅथी व आयुर्वेदिक औषधे दिल्यास रुग्ण निश्‍चितच बरा होईल, त्यामुळे महापालिकेला उपाययोजनेंतर्गत होमिओपॅथी औषध वाटप करण्याची परवानगी मिळावी अशा आशयाचे पत्र महापौर सतीश कुलकर्णी मुख्यमंत्री उद्धव ठाकरे यांना लिहिले होते. त्यानुसार आरोग्य सचिवांनी महापालिकेला पत्र लिहून सूचना दिल्या आहे. त्यात महापालिकेने आपल्या स्तरावर निर्णय घेऊन होमिओपॅथी औषधांचे वाटप करावे, कोविडचा सामना करण्यासाठी आयुर्वेदिक, युनानी व होमिओपॅथी विषयक मार्गदर्शक सूचना तयार करून उपचार करावे, साथीच्या आजाराची तीव्रता सौम्य तसेच मध्यम प्रभाव असलेल्या रुग्णांवर देखील प्रभावी ठरत असल्याने त्या अनुषंगाने औषधांचा वापर करावा अशा सूचना देण्यात आल्या आहे.

कोरोनाच्या तिसऱ्या लाटेचा धोका लक्षात घेऊन होमिओपॅथी व आयुर्वेदिक औषधांचा वापर साथ रोगात करणे गरजेचे आहे. यामुळे बचाव करण्यापासून संरक्षण होण्यास मदत होईल. लवकरच कोरोना मुक्तीच्या दिशेने वाटचाल होईल. - सतीश कुलकर्णी, महापौर,नाशिक.