नाशिक : नाशिक शहरातील धोकादायक उघड्या वीजतारांबाबत राज्याचे ऊर्जामंत्री नितीन राऊत (Nitin Raut) उदासीन आहेत. नाशिकच्या ऊर्जा प्रश्नांबाबत बुधवारी (ता. ९) पालकमंत्री छगन भुजबळ (Chhagan Bhujbal) यांच्या पुढाकाराने मुंबईत झालेल्या बैठकीत ऊर्जामंत्री राऊत यांची नाशिक शहरातील प्रश्न सोडविण्याबाबत अनास्था समोर आली, असा आरोप आमदार प्रा. देवयानी फरांदे यांनी केला.

ओव्हर हेड वीजतारा हा अत्यंत गंभीर विषय

बैठकीनंतर आमदार फरांदे यांनी निवेदनाद्वारे ऊर्जामंत्र्यांच्या कामकाजावर टीका केली आहे. फरांदे यांच्या निवेदनानुसार नाशिक शहर औद्योगिक नगरी असताना ऊर्जा विभागाकडून वीजपुरवठा हा खंडित स्वरूपाचा असतो. कमी दाबामुळे त्याचा परिणाम होऊन शहरातील अनेक नागरिकांचे इलेक्ट्रिकचे साहित्य जळाल्याने आर्थिक नुकसान झाले आहे. शहरातील खासकरून गावठाण भागातील ओव्हर हेड वीजतारा हा अत्यंत गंभीर विषय असून या तारा भूमिगत करण्यासाठी ऊर्जा विभागाकडे निधीची मागणी केली. स्मार्टसिटीअंतर्गत सुरू असलेल्या व पूर्णत्वास आलेल्या रस्त्यांवरील वीजतारा भूमिगत करण्यासाठी निधी उपलब्ध करून देण्याची मागणी आमदार देवयानी फरांदे यांनी ऊर्जामंत्री यांच्याकडे केली होती. मात्र बैठकीत नाशिक शहराला भेडसावणाऱ्या समस्यांबाबत ऊर्जामंत्री नितीन राऊत यांची अनास्था समोर आली.

नाशिक शहराला नियमित दाबाने वीजपुरवठा करण्याबाबत किंवा नाशिक शहरातील ओव्हर हेड वीजतारा भूमिगत करण्याबाबत नितीन राऊत यांच्याकडून कोणतेही ठोस आश्वासन दिलेले नाही. त्यामुळे ऊर्जा विभाग शहरातील उघड्या व धोकादायक वीजतारांबाबत उदासीन असल्याचे दिसून येते, असाही आरोप आमदार फरांदे यांनी केला आहे.