मालेगाव : येथील उपप्रादेशिक परिवहन अधिकारी कार्यालयात मावळते आर्थिक वर्षे लाभदायी ठरले आहे. २०२३- २०२४ या आर्थिक वर्षात ३१ हजार ६१३ वाहनांची नोंद झाली असून गेल्यावर्षीच्या तुलनेत वाहनांच्या संख्येतही ५३ ने वाढ झाली आहे. गेल्या आर्थिक वर्षात ३१ हजार ५६२ वाहनांची नोंदणी झाली. यात एक हजार ५११ इलेक्ट्रीक वाहने आहेत. (Nashik 32 thousand new vehicles registered in Malegaon marathi news)

गेल्या वर्षीपेक्षा यावर्षी येथील उपप्रादेशिक परिवहन विभागाच्या उत्पन्नात वाढ झाली आहे. विभागाला तडजोड शुल्क, दंड वसुली, नवीन वाहन नोंदणी, वाहन चालवण्याचे परवाने, वायुवेग पथकांमार्फत करण्यात येणारी कारवाई, पर्यावरण कर, योग्यता प्रमाणपत्र, लोडिंग, विना हेल्मेट, सीट बेल्ट न लावणे, फिटनेस, चॉईस नंबर, यासह विविध प्रकारच्या कारवायातून ८७ कोटी ३० लाखाचा महसूल मिळाला आहे. यात ८३ कोटी ९१ लाख १२ हजार महसूलातून तर तडजोड शुल्कातून तीन कोटी १७ लक्ष २२ हजार तसेच दंड वसुलीतून २२ लाख ४७ हजार मिळाले आहे.

दुचाकींची संख्या अधिक

नवीन वाहन नोंदणीमध्ये ट्रॅक्टर, डंपर, मालवाहू, दुचाकी, प्रवासी वाहने, चारचाकी वाहने, रिक्षा, मालवाहू रिक्षा, क्रेन, पोकलँड, रुग्णवाहिका, बस, मोपेड, ट्रेलर आदी प्रकारच्या वाहनांची नोंदणी करण्यात आली आहे. यात सर्वात जास्त २३ हजार ४३४ दुचाकींची नोंदणी झाली आहे. पेट्रोल दुचाकी बरोबर येथे इलेक्ट्रिक दुचाकीची मोठ्या प्रमाणात विक्री झाली आहे.  (latest marathi news)

अशी झाली वाहनांची नोंदणी

दुचाकी २३ हजार ४३४

कार २ हजार ३९०

टँकर ८४

ट्रॅक्टर २ हजार ९२६

इ वाहने १ हजार ५११

इतर वाहने ५हजार ७०५