नाशिक : ठाणे लाचलुचपत प्रतिबंधक विभागाच्‍या कारवाईत आठ लाखांची लाच स्वीकारल्याच्या प्रकरणात शिक्षणाधिकारी वैशाली झनकर-वीर यांच्‍या पोलिस कोठडीत एक दिवसाची वाढ करण्यात आली आहे. यापूर्वी त्यांना दोन दिवसांची पोलिस कोठडी सुनावली होती. परंतु, प्रकृतीचे कारण देत त्या जिल्‍हा रुग्‍णालयात दाखल झाल्‍या होत्‍या. यामुळे तपास करता न आल्‍याचे पोलिसांनी सांगितले. त्यामुळे आणखी एक दिवस पोलिस कोठडी वाढविली आहे.

शिक्षण संस्‍थेच्‍या शाळांना मंजुर अनुदानातून नियमित वेतन सुरु करण्यासाठी कार्यादेशासाठी नऊ लाखांची मागणी करत व आठ लाखांवर तडजोड करुन चालकामार्फत स्‍वीकारल्‍याचा आरोप शिक्षणाधिकारी वैशाली झनकर-वीर यांच्‍यावर आहे. सोमवारी त्यांना न्‍यायालयात उपस्थित करण्यात आले होते. तपास होऊ न शकल्‍याने पुन्‍हा पोलिस कोठडीची केलेली मागणी न्‍यायालयाने मान्‍य करत एक दिवस कोठडीत वाढ केली. दरम्यान, मंगळवारी (ता. १७) त्यांना पुन्हा न्यायालयात हजर केले जाणार आहे.