Nashik Bribe Crime : गेल्या आठवड्यात दीड लाखांच्या लाचप्रकरणी दाखल गुन्ह्यात पसार झालेला पुरातत्त्व व वस्तुसंग्रहालय विभागाचा संचालक तेजस मदन गर्गे अजूनही लाचलुचपत प्रतिबंधक विभागाच्या पथकाच्या हाती लागलेला नाही. नाशिकच्या पुरातत्त्व विभागाच्या सहायक संचालिकेने लाच स्वीकारल्यानंतर लाचलुचपत प्रतिबंधक विभागाने कारवाई केल्यापासून गर्गे पसार झाला आहे. ( Director Tejas Garge not in hands of anti corruption bureau )

पेठरोडवरील रामशेज किल्ल्याच्या हद्दीत कंपनी सुरू करण्यासाठी पुरातत्त्व विभागाचे ना हरकत प्रमाणपत्र देण्यासाठी नाशिकच्या पुरातत्त्व विभागाच्या सहायक संचालिका आरती आळे यांनी दीड लाख रुपयांची लाच स्वीकारली होती. सहाय्यक संचालिका यांनी घेतलेल्या लाचेत हिस्सा होता. मात्र, लाचखोर गर्गे ७ मेपासून फरार आहेत.

गर्गे यांचे मुंबई, पुणे व नाशिक निवासस्थानाबाहेर लाचलुचपतकडून नजर ठेवली आहे. तसेच, याप्रकरणी नातलग व मित्रांचीही चौकशी करण्यात आली असून, त्याचे ताडदेव (मुंबई) येथील घर पथकाने सील केले आहे. गर्गे यांच्या अटकेसाठी पथकांकडून तांत्रिक विश्लेषणानुसारही माग काढला जात आहे.

पुरातत्त्व विभागाच्या नाशिक सहाय्यक संचालिका आरती आळे (४१, रा. अनमोल नयनतारा, राणेनगर), विभागाचे संचालक तेजस मदन गर्गे (रा. मुंबई) या दोघांविरुद्ध गुन्हा दाखल करण्यात आलेला आहे. आरती आळे या प्रसूती रजेवर असताना त्यांनी त्यांच्या निवासस्थानी तक्रारदाराकडून लाचेची रक्कम स्वीकारली आणि त्यानंतर गर्गे यांना फोन करून त्यांच्या हिस्स्याच्या रकमेबाबत त्यांचे बोलणेही झाले. गर्गे यांच्या अटकेनंतर आणखी खुलासा होऊ शकेल.