Nashik News : सिडकोतील मोरवाडीत असलेल्या अपार्टमेंटच्या तिसऱ्या मजल्यावरून अवघ्या वर्षाचा चिमुरडा गॅलरीतून खाली बघताना तो पडला असता पालकांच्या काळजाचा ठोकाच चुकला... मात्र देव तारी त्याला कोण मारी, या उक्तीप्रमाणे, तिसऱ्या मजल्यावरून पडलेला चिमुकला खाली पावसामुळे साचलेल्या पाण्याच्या तळ्यात पडल्याने बचावला. (child who fell from third floor was fortunately saved)

राजेश गुलाब गोसावी (वय १, रा. मोरवाडी) असे या चिमुरड्याचे नाव आहे. शुक्रवारी (ता. १०) सायंकाळी सिडको परिसरामध्ये वादळी वार्यासह अवकाळी पावसाने हजेरी लावली होती.

त्यावेळी तिसर्या मजल्यावर राहणार्या गोसावी यांचा एका वर्षाचा मुलगा खेळत-खेळत गॅलरीजवळ आला. बाहेर सुरू असलेला मुसळधार पाऊस पाहण्यासाठी त्याने गॅलरीतून डोकावले असता, त्याचा तोल गेला आणि तिसर्या मजल्यावरून खाली पडला. (latest marathi news)

त्याचवेळी जोरदार पावसामुळे खाली मोठ्याप्रमाणात पाणी साचलेले होते. त्याच पाण्यात राजेश पडला. तर, रस्त्यालगत आडोशाला थांबलेल्या नागरिकांनी लगेचच धाव घेत राजेशला पाण्यातून बाहेर काढले.

यात दूर्घटनेमध्ये चिमुकल्या राजेशच्या तोंडाला मार लागला आहे. मात्र तो बचावल्याचे पाहून राजेशच्या पालकांचा जीव भांड्यात पडला. राजेश यास उपचारासाठी तात्काळ जिल्हा शासकीय रुग्णालयात दाखल करण्यात आले असून, त्याच्यावर उपचार सुरू आहेत.