नाशिक : कोरोना रुग्णांच्या उपचारानंतर आता म्युकरमायकोसिस (mucormycosis) आजाराने तोंड वर काढल्याने अशा महागड्या आजाराच्या रुग्णांवर उपचार करण्यासाठी महापालिकेने रुग्णालयांमध्ये बाह्य रुग्ण विभाग सुरू करण्याचा निर्णय घेतला आहे.

फेब्रुवारी ते मे महिन्याच्या अखेरपर्यंत मोठ्या प्रमाणात फैलावणाऱ्या कोरोना रुग्णांची संख्या जून महिन्यात झपाट्याने आटोक्यात आली आहे. परंतू कोरोना रुग्णांवरील उपचारानंतर काही रुग्णांना म्युकरमायकोसिस आजार बळावला असून या आजारावर उपचारासाठी मोठ्या प्रमाणात खर्च येत आहे. सर्वसामान्यांना परवडणारा हा आजार नाही. त्यामुळे अशा रुग्णांसाठी महापालिकेच्या वतीने पोस्ट कोविड बाह्यरुग्ण विभाग सुरू करण्यात आला आहे.

पालिकेच्या दवाखान्यांमध्ये देखील तपासणीची सोय करण्यात आली आहे. कोरोना उपचारानंतर काही त्रास असल्यास नागरीकांनी तेथे तपासणी करून घेण्याचे आवाहन आयुक्त कैलास जाधव यांनी केले आहे. पुर्व विभागात डॉ. झाकिर हुसेन रुग्णालय, नाशिकरोड विभागात जेडीसी बिटको रुग्णालय, पंचवटी विभागात इंदिरा गांधी रुग्णालय, सिडको विभागात श्री स्वामी समर्थ रुग्णालय, सातपूर विभागात गंगापूर रुग्णालय, पश्‍चिम विभागात मेनरोड वरील जिजामाता रुग्णालयात उपचाराची सुविधा करण्यात आली आहे.

(Nashik Corporation started outpatient departments in hospitals for mucormycosis patients)