Nashik Crime : अशोकनगर येथील टेक्सस्टाईलच्या दुकानाच्या गल्ल्यातून साडेसात लाखांची रोकड, नाशिकरोडला बंद घराचा कडीकोयंडा तोडून सव्वा दोन लाख तर सिडकोतील घराचा कडीकोयंडा तोडून चोरट्यांनी ३४ हजार असा तीन घरफोड्यांमध्ये सुमारे दहा लाखांचा ऐवज चोरून नेला आहे. याप्रकरणी सातपूर, अंबड व नाशिकरोड पोलिसात गुन्हे दाखल केले आहेत. (10 lakhs stolen in three house burglaries)

आशिष जगदीश भट्टड (रा. चंद्रलीला बंगला, सातपूर कॉलनी) यांच्या फिर्यादीनुसार, त्यांचे अशोकनगर येथे प्रगती टेक्सस्टाईल्स मार्केट हे कपड्याचे दुकान आहे. रविवारी (ता. २९) पहाटे दोनच्या सुमारास अज्ञात चोरट्याने दुकानाच्या पाठीमागील खिडकीतून आत प्रवेश केला आणि त्याने गल्ल्याच्या ड्राव्हरमध्ये घरपट्टी भरण्यासाठी ठेवलेले ७ लाख ५० हजारांची रोकड चोरून नेली.

याप्रकरणी सातपूर पोलिसात घरफोडीचा गुन्हा दाखल आहे. उपनिरीक्षक रोहीत गांगुर्डे हे तपास करीत आहेत. तर दुसरी घरफोडी नाशिकरोड हद्दीतील शिंदेगाव येथे झाली. रवी संतू पाळदे (रा. शिंदेगाव) यांच्या फिर्यदीनुसार, शनिवारी (ता. २८) सकाळी साडेआठ ते रात्री दहा यादरम्यान अज्ञात चोरट्यांनी पाळदे यांच्या बंद दरवाजाचा कडीकोयंडा तोडून आत प्रवेश केला. (latest marathi news)

चोरट्यांनी घरातून २ लाख २२ हजारांच्या दागिन्यांसह रोकड चोरून नेली. याप्रकरणी नाशिकरोड पोलिसात घरफोडीचा गुन्हा दाखल केला आहे. तिसरी घरफोडी, सिडकोतील वृंदावन चौकातील बंद घराचा कडीकोयंडा तोडून चोरट्याने सोन्या-चांदीचे दागिने चोरून नेले.

स्नेहल महेश सोनजे (रा. वृंदावन चौक, सिडको) यांच्या फिर्यादीनुसार, २० तारखेला मध्यरात्री अज्ञात चोरट्यांनी सदरची घरफोडी केली. यात चोरट्यांनी ३४ हजारांचे सोन्या-चांदीचे दागिने चोरून नेले. याप्रकरणी अंबड पोलिसात घरफोडीचा गुन्हा दाखल केला आहे.