नाशिक : शहर गुन्हेशाखेच्या विशेष पथकाने शिंदेगावातील उड्डाणपुलाखाली अट्टल सोनसाखळी चोरट्याला जेरबंद केले. चौकशीतून उपनगर हद्दीतील दीड वर्षांपूर्वीची जबरी चोरीसह ओझर व वाळुंज (जि. संभाजीनगर) येथील जबरी चोरीच्या गुन्ह्यांची उकल झाली आहे. आकाश भाऊसाहेब चव्हाण (२५, रा. मातीनगर, सुरेगाव, कोळपेवाडी, ता. कोपरगाव, जि. अहमदनगर) असे अटक करण्यात आलेल्या सोनसाखळी चोरट्याचे नाव आहे.

विशेष शाखेचे अंमलदार रवींद्र दिघे यांना संशयित आकाश शिंदेगावात येणार असल्याची खबर मिळाली होती. त्यानुसार विशेष शाखेच्या पथकाने सापळा रचला आणि त्यास जेरबंद केले. त्याच्याकडून दुचाकी (एमएच १७ सीझेड ८७७५) जप्त केली आहे. पोलिस चौकशीमध्ये त्याने ३ आक्टोबर २०२२ रोजी गांधीनगर प्रेसजवळ रिता अशोक लोध (रा. जेलरोड) यांच्या गळ्यातील राणीहार खेचून नेला होता. याप्रकरणी उपनगर पोलिसात गुन्हा दाखल आहे.

तसेच, वाळूंज (जि. छ.संभाजीनगर) व ओझर पोलीस ठाण्याच्या हद्दीतही सोनसाखळी चोरी केल्याची कबुली दिली आहे. याप्रकरणी सराईत सोनसाखळी चोरटा आकाशला उपनगर पोलिसांच्या ताब्यात देण्यात आले आहे. सदरची कामगिरी विशेष शाखेचे पोलीस निरीक्षक जयराम पायगुडे यांच्या मार्गदर्शनाखाली सहायक निरीक्षक हेमंत नागरे, लाड, रंजन बेंडाळे, ताजणे, गायकर, भामरे, दिघे, योगेश चव्हाण, ठाकरे, नांद्रे, बागडे, येवले गांगुर्डे, भागवत, चव्हाण यांनी बजावली.