जुने नाशिक : अल्पवयीन मुलीस आपटी बॉम्ब घेऊन देतो. असे आमिष दाखवून पडक्या इमारतीत नेऊन विनयभंग केला. मंगळवार (ता.८) रात्रीच्या सुमारास जुने नाशिक परिसरात घटना घडली. पोलिसांनी अवघ्या काही वेळातच संशयीतास अटक केले. पीडित चिमुकली नवरात्रोत्सवानिमित्ताने दांडिया खेळत होती. स्थानिक रहिवासी असलेला संशयित महेश रघुनाथ वांद्रे (वय.४७) याने पीडितास आपटी बॉम्ब घेऊन देतो असे आमिष दाखविले. (Minor girl molested suspect arrested by police )

तिला एका पडक्या इमारतीत घेऊन जात तिच्या मनात लज्जा उत्पन्न होईल असे अश्लील वर्तन करून विनयभंग केला. घडलेला प्रकार पीडिताने कुटुंबीयास सांगितला. कुटुंबीयांसह परिसरातील काही जणांनी संशयीतास चोप दिला. भद्रकाली पोलिसांना घटनेची माहिती दिली. घटनेचे गांभीर्य घेता तात्काळ पोलीस घटनास्थळी दाखल झाले. त्यांनी संशयीतास ताब्यात घेतले. पीडीतास विश्वासात घेऊन चौकशी केली. तिने घडलेला प्रकार पोलिसांना सांगितला.

यापूर्वीही काही दिवसांपूर्वी संशयिताने असाच प्रकार केला असल्याचे सांगितले. त्याच्याविरुद्ध बाललैंगिक अत्याचार विरोधी कायदा अंतर्गत विनयभंगाचा गुन्हा दाखल करण्यात आला. घटनेची अधिक चौकशी पोलीस करत आहे. बुधवार (ता.९) दुपारी त्यास जिल्हा न्यायालयात हजर करण्यात आले. यानिमित्ताने लहान मुली आणि महिलांच्या सुरक्षेचा प्रश्न पुन्हा एकदा उपस्थित झाला आहे.

अवैध धंद्यांचा अड्डा

घटना घडली ती पडकी इमारत पूर्वी महापालिका प्राथमिक आरोग्य केंद्राची होती. काही कारणास्तव आरोग्य केंद्र बंद पडल्याने नशेबाज आणि चोरट्यांनी इमारतीचे दारे खिडक्या आतील साहित्य चोरून नेले. सध्या ती इमारत पडीक आणि धोकादायक झाली आहे. नशेबाज आणि गुन्हेगारांचे आश्रयस्थान ठरत आहे. महापालिकेकडून संबंधित इमारत पूर्णपणे जमीनदोस्त करून त्याठिकाणी पुन्हा रुग्णालय निर्माण करावे. अशी मागणी गेल्या अनेक वर्षांपासून स्थानिक नागरिक करत आहे.