Nashik News : येथील भाजीपाला बाजारात बटाट्यांची मागणी वाढली आहे. आवक कमी झाल्याने दरातही मोठी वाढ झाली. लग्नसराई व बटाट्यांचे वेफर्स, चकल्या तयार करण्याचा सिझन आहे. त्यामुळे गेल्या वर्षी २० रुपये किलोने मिळणारा बटाटा सध्या ३५ ते ४० रुपये किलोने मिळत आहे. यंदा २० टक्क्यांनी मागणी वाढली असून दरातही वाढ झाली आहे. उत्तरप्रदेश, मध्यप्रदेश, गुजरात या तीनही राज्यात बटाट्यांचे उत्पादन मोठ्या प्रमाणात घेतले जाते. ( demand for potatoes has increased in vegetable market )

महाराष्ट्रात उत्तर प्रदेशातील आग्रा येथील बटाटा विक्रीस येत आहे. येथे रोज ५० ते ६० टन बटाट्याची विक्री होते. शहरापेक्षा कसमादे परिसरात बटाट्याला मागणी आहे. गेल्या वर्षापेक्षा यंदा २० टक्क्यांनी उत्पादन घटल्याचे सांगितले जात आहे. त्यामुळे बाजारात बटाट्यांची आवक कमी झाली आहे. २०२२ मध्ये १४ रुपये किलो तर २०२३ मध्ये बटाटा घाऊक बाजारात १६ रुपये किलोने विकला गेला.

सध्या येथे ३५ रुपये किलोने बटाट्याची विक्री होत आहे. येथे आग्रा, डिसा, विजापूर, इंदूर या राज्यातील बटाटा हंगामानुसार येत असतो. जानेवारी महिन्यात मध्यप्रदेश तर फेब्रुवारी, मार्चमध्ये गुजरात येथील, मार्च ते डिसेंबरपर्यंत उत्तर प्रदेशातील बटाटा विक्रीसाठी येत असतो. आग्रा येथील बटाटा खाण्यासाठी रवेदार व चवदार असल्याने त्याला मागणी असते.  (Latest Marathi News)

गुजरात येथील बटाटा खातांना गोड लागतो. त्यामुळे असंख्य ग्राहक आग्राच्या बटाट्याला आवर्जून पसंती देतात. बटाट्यांमध्ये ख्याती, पोखराज, मोहन, संगम, सूर्या, २००१ यांसह विविध प्रकारच्या जाती आहेत. पंजाब, पश्‍चिम बंगाल, कर्नाटक, उत्तर प्रदेश, मध्यप्रदेश, गुजरात या राज्यांमध्ये मोठ्या प्रमाणात बटाट्यांचे उत्पादन होते. महाराष्ट्रात उत्तर प्रदेशच्या बटाट्याला पसंती दिली जाते.

''बटाट्यच्या उत्पन्नात गतवर्षीपेक्षा यंदा २० टक्क्यांनी घट झाली आहे. अनेक व्यापारी बटाटा कोल्ड स्टोरेजमध्ये ठेवतात. परंतु यंदा उत्पादन घटल्याने स्टोरेज करण्याकरिता बटाटा शिल्लक नाही. त्यामुळे बटाट्याच्या किंमती वाढल्या आहेत.''- दीपक पाटील, घाऊक व्यापारी, शिवनेरी ॲन्ड कंपनी, मालेगाव.